PARTY POLITICS LEH VC/LC INTHLAN

PARTY POLITICS LEH VC/LC INTHLAN 

- Rev. Dr. Zaichhâwna Hlàwndo

Tun September 24, 2024 ah Village Council Inthlanna (by election) kan nei dâwn a. Nakum-ah Village Council/ Local Council inthlanpui kan neih leh dáwn. Zofâte khawtláng rorelna VC/LC kan kalpui dan hi mut mawh hnar mawh a hun réi tak ka lo neih tawh a ni. He VC/LC kalpui dan hi thiah a, a thar hman mai theih tûr rûahmanna te pawh ka ziak tawh a, mahse chu chu tun tumah chuan ka rawn tarlang rih lovang. Tun tumah chûan he VC/LC kan inthlan dân leh kalpui dan thalo hi eirûkna bul a nih dan te, kan khawtlang nun leh Kristianna ti chhetû a nih dan te kan ziak dâwn a ni. 

Zofate zingah hian ram leh hnam hmangaih lo, siam that duhlo chu kan awm lo ang tih mai tûr a ni. Amaherawhchu engtiang chiahin ngê kan siam that ang? Khawi atang hian nge bul tan tûr? tih hi kan buaina chu a ni. Chemtâtrâwta thawnthu ang mai hian kan in puh tawn kûal vêl vek a, a ngâiah kan kûal kan kûal mai chu a ni. Chemtatrâwta kha Kaikûang cheh mai mai theihloh khan inveng tha se chuan thubûai leh hlabûai a awm lo mai tûr a ni. Chuvang chuan ram leh hnam heti taka a chhiat hma hian lo in vêng ila tha tûr tih mai pawh a awl ta a nih hi. Article dangah ka ziah tawh ang khan ram leh hnam siam tha tur chuan PARTY POLITICS system thalo ‘Thatheihmiahlohna Bâwm’ hi kan thiah hmasak phawt a ngai a ni. 

A hmasa berah chuan VC/LC kan thlan leh siam dân hi khawtlâng lungrûallohna thlentu bul a ni tih hi ka sawi duh chu a ni. Tuna VC/LC roreltû tûr siam kan tum dan atangin indonain bul kan tan nghal a. Party tinin an Party Candidate tûr an buaipûi a, khawchhûngah indopûi an rawn siam thin a ni ber mai. Party hrûaitute’n candidate tûr mitha mipuite vote duh tûr an zawng ang. Khawtlâng ah mi hmingtha an thlanchhuahte chu party politics ah an hnû lût a, an duh emaw duh lo emaw party politics indona chhûngah an zûan luh ve kha a ngai. Nihna thar an in bel a ngai a, an hmelma ni ngai miahlo te pawh hmelma leh eptû anga do a lo ngai ta thin a ni. He VC/LC inthlan hi party hrûaitûten an party sawhngheh nân party politics bawlhhlawh a tel duh ngailote thlêmna leh hnuhluhna hmanrûa ah an hmang thin. 

A pahnihna ah chûan VC/LC siam dan leh hnathawh dan hi eirûkna (corruption) bul intanna a ni. Khawtláng rorelna hna hautak tak thawk tûra kan thlan leh siam te hian an tha leh zung, hun púm deuhthaw an hman a ngái. Chutih rual chuan sawrkar atangin hlawh mumal, chhûngkaw chawmna tham hlawh an nei lo. Chûvang chûan khawtláng tana hnathawh tûr, sum lo kal atang te khan hlawkna lo insiam duhna te a lo piang a. An tân chûan eirûkna tûr thlêmna hautak tak hmachhawn chunga rorelna kalpúi a ngai ta thin a ni. VC/LC mifel tak tak deuh vek, khawtlang, ram leh hnam tana mi rinawm tak tak kan neih laiin VC/LC nih avanga hausa ta thûr thûr pawh kan awm ta mêk zel chu a nih hi. 

A pathumna ah chuan VC/LC thlan leh kalpui dan thalo hi Zo nun mâwi tichhetû a ni. Tun hma chuan khawtin mai hi an in luangrual êm êm a, in thenawm khawven chungchângah pawh a thlum a al eiza in an nung thin. Sa an kah te pawhin thenawm khawvêng te an pe ve a, thlai thar te pawh an in pe lîam lîam a, chawhmehte pawh an in suah thin. Tunah chuan chúngte chu thawnthu hlúi an lo chang zo tâ a ni ber mai. Khawtlâng rorêlna chu party politics atanga siam a nih tlat avangin khawte ber thlengin party indona chuan chim loh khûa a neilo a ni ber mai. Chu party politics indona chuan chhûngkûa min thendarh a, khawtlang mipuite tûl lovah kan indo a, kan nihna ni miahlo party politics in min pek- MNF, Congress, ZPM, PC, AAP leh BJP nihna te kan in bel a. ‘Saw pa saw MNF pâ a nih saw, saw nu saw Congress nû a nih sawi!’ ti a in elsen nân chu party hming chu kan hmang ta thin a. Chu party politics chuan thingtlang khûa leh khawpui veng hráng hráng inpumkhatna, zo nun mâwi leh nuam tak kha a thiat zo ta a ni ber mai. 

Chutiang taka VC/LC kan siam dan a thalo tih kan hriat reng chu a siam that dân a awm em? Engtinnge VC/LC in thlana party politics chu kan tih bo ang? Party tel lovin VC/LC candidate chu a siam theih loh em ni tihte kan ngaihtuah ngâi ta hlê a ni. Kan ram leh hnam hi kan hmangaih tak tak a, eirûkna (corruption) hi kan do tak tak dâwn a nih chûan Phêngphehlepa khûa a tlai hma a kan chet chhuah a ngai ta a ni. 

Mizoram mipuite hian VC/LC hi party politics candidate hmanga siam tûr ti hi danah a awm hran lo tih kan hriat a ngai. He party system tih dan leh kalphung thalo awm chhan chu induhsak bîk duhna vang a ni. Sawkar dinglai party thlawploh VC/LC neih hlauhna vang te pawh a ni. Tuna kan sawrkar dinglaiin an thupui chu mipúi sawrkar siam a ni. Mipui sawrkar siam tur chuan VC/LC ah party sawrkar siam loh hi hna hmasa ber tûr chu a ni ang.

Party ruihchilh duhlo khua leh veng thenkhatah Independent candidate in VC/LC siam te pawh kan nei tawh thin. Kan khawtlang leh vêng kan hmangaih a, inpumkhatna kan duh a, rorelna thianghlim neih kan duh chûan VC/LC a party sawrkar siam loh kha a pawimawh hmasa chu a ni. Inthlan pawh ngai lovin chuhtû awm lo pawhin VC/LC te hi kan duh chuan kan siam thei. A nih loh pawhin tlawmngâia Independent Candidate tûr kha mi engemaw zah kan sawm ang a, chûng mite zinga mi chu kan thlang mai ang. 

VC/LC thlang tur hian campaign chiam chiam pawh a ngai lo. Khaw tin leh veng tin hian kan Veng mi leh sa chu kan in hre vek a, khaw dang leh veng dang a mite kha in candidate ve theih pawh a ni bawk lo. Zofate chu thil tha intihhmuh hnam kan ni a, tûn by election atang hian in tihhmuh sup sup ila, corruption kan do hlawhtling nghâl a ni mai dawn lawm ni? Kohhran pâwl hrang hrangte pawhin eirûkna (corruption) hi kan vei tlang vek a, kan do tlâng mek a ni. He eirûkna lo awmna bul VC/LC a party politics hmanga kan kalpui hi thiat ngam ila kan hlawhtling a ni mai. Kohhran hote’n kan tawngtaina hi a taka kan umzui chuan siloh chûan hmelma pa hnathawh hi kan tirêm tak tak lovang. 

Kan ram leh hnam damna kan duh tak tak a, inpumkhatna kan duh a, eirûkna kan do dawn a nih chûan VC/LC inthlan a party politics kal phung thalo hi i do ngam ang u. Hebrai 12:4 ah chuan ‘Sual dovin thisen chhuak khawpin tan in la lo’ tih pawh kan hmu a. Thisen chhuah pawh ngailovin, thil diklo leh thalo kan hmuh leh hriat VC/LC party System a kalpui hi thiat ngam ila, do ngam ila hmelma pa chuan tihngaihna a hre dawn lo a ni mai. Sawi sawi lam a ni lo, a tih a tih, a chêt a kan chêt chhuah chuan VC/LC thlan dan kalphung thar chu a piang mai dawn a ni.