MSCW Chairperson atanga banna thehlut

Mizoram State Commission for Women (MSCW) Chairperson C. Lalchhandami chuan MSCW Chairperson atanga a banna chu Inrinni khan a thehlut.

Social Welfare, Tribal Affairs, Women & Child Development-a Secretary hnena banna a thehluh ah hian Lalchhandami chuan a pian kum chungchangah eptu Political Party lam atanga beihna nasa tak a tawk tih tarlangin, “Kum 65 thleng chelh theih anih avangin ka kum dik tak ang chuan la thawk chhunzawm zel thei tur chu ka la ni a, hetiang boruak karah chuan chak leh tha tak phur taka hnathawh zui te pawh a harsa dawn a. Ka awmna ZPM Political Party hruaitute nen a kan inbiakrawn hnuah hetianga Party inchirtheihna boruak tha lo tak awm zui tur hi tha lo ka ti a, Women Commission ngei pawh a zahawmna vawnhim zel anih theih nan Chairperson ka nihna atang hian inhnuhdawh mai tha in ka hria,” tiin a banna lehkha hi a thehlut a ni.

C. Lalchhandami chuan an hotute duhsakna avangin kumin March 8 khan Mizoram State Commission for Women Chairperson atana ruat a nih thu pawh a lehkha ah hian tarlangin, “He ka mawhphurhna hi theihtawp chhuahin ka chelh zui a. He hna ka thawh chhung hun reilo te thla nga (5) chhung hian Case hearing 102 lai ka nei hman a, hlawhtlinna (success story) 80% a awm tawh a ni,” a ti a. “Ka awm hma May 2019 atanga February 2024 (kum 5 chhung) thleng hian case hearing an lo neih zat chu 86 cases a ni a. Chutiang atanga thlir chuan ka Chairperson chhung hian hmasawnna nasa tak kan hmu thei tih a hriat awm e,” a ti bawk.

Tarlan tawh thin angin MSCW-a Chairperson C. Lalchhandami hi MNF Legal Board chuan a kum a over tawh hnua ruat nia sawiin, September 9, 2024 tlai dar 5:00 hmaa bang turin an phut a ni.