Mizoram-ah National Forest Martyrs Day hmang

Environment, Forests & Climate Change Department chuan ramngaw leh nungcha te humhalhna kawnga nunna chanta te hriatrengna ni ‘National Forest Martyrs Day’ chu nimin, September 11, 2024 khan State Forest Training Institute, Bethlehem Vengthlang-ah an hmang a, he hun hi EF&CC Department changtu Minister Lalthansanga leh Principal Chief Conservator of Forests AK. Biswal te chuan an hmanpui a ni.

He hunah hian EF&CC Department chuan an thawhpui te duty laia boral mi 12 – Lalzawmliana, Wildlife Guard, Dampa Tiger Reserve; Lalsiamliana, Forester, Durtlang; Lalnunzira, Forester, College Veng; R.L Zoliana, Tuikual South; Zatluanga, Wildlife Guard, Darlawn; K. Lallawmkima, Forest Guard, Kolasib; Laithansanga, Forest Guard, Khawruhlian; Vanlaltluanga, Deputy Ranger, Kawnpui; B. Rothangliana, Chowkidar, Aizawl Zoo; C. Lalrinkima, Forester, Lunglei leh C. Lalengmawia, Forest Guard, Champhai leh Sangkhuma Wildlife Guard Dampa Tiger Reserve te hriatrengna leh anmahni zahna chibai bukna hun hman a ni.

National Forest Martyrs Day hi kum 2013 atang khan September ni 11-ah India ramah hman tan a ni a, September ni 11 hi kum 1730-a Bishnoi hnam mi 363 ten ramngaw an humhalh avanga an lal kuta an thih ni a ni a, hemi hriatreng nan hian September ni 11 hi ‘National Forest Martyrs Day’ atan kumtin hman thin a ni ta a ni.