Aizawl-ah Mizoram VDVK Outlet hawn a ni

Cooperation Minister PC. Vanlalruata chuan nimin khan Aizawl Babutlang-a RCS Office Ground Floor-ah Mizoram Van Dhan Vikas Kendra (VDVK) Outlet a hawng.

Van Dhan Vikas Kendra (VDVK) Outlet hawnna puala inkhawm RCS Meeting Hall-a neih ah Cooperation Minister chuan Department hnuaia Federation-te chu tunlai khawvel hmasawnna thang zel mila an kal leh an inherrem zel a pawimawh thu a tarlang a. Khawvel khawi ramah pawh, Federation leh Cooperative Society-te an changtlunna apiang chu ram nuam leh hmasawn chak ber berte an ni zel tih a sawi a. Hei bakah hian ramin hma a sawn tak tak theihna tur chuan Federation leh Department-te thawhhona tha chu thil pawimawh ber pakhat a nih thu tarlangin, hemi atan hian inrawnkhawmna mumal tak la buatsaih a tul tih a sawi a. Federation-te chu Sawrkar thar 'Kalphung thar' thlen tura thawhpuiah a sawm a ni.

He hun hi Cooperative Societies-a Registrar, R. Lalremsanga chuan kaihruaiin inlawmna thu a sawi a. Pradhan Mantri Janjatia Vikas Mission (PMJVM), Van Dhan Mission tih bawk hi Mizoram-ah chuan January 23, 2020 atang khan Cooperation Department chuan a kalpui a, he Scheme hi March 27, 2023 atang khan Central Sector Scheme a ni tawh nghe nghe a. He Scheme hnuaiah hian Van Dhan Vikas Kendra (VDVK) 259 din tawh niin VDVK-te hnenah hian training bakah hmanrua te a thlawna pek an ni a. Heng Operational VDVK-te thil siam chhuah hrang hrangte phochhuah sak hi Cooperation Department chuan a ngai pawimawh hle a. Tunah hian a bultan nan VDVK 32 te thil siamchhuah hrang hrangte chu lakhawmin heng thil siamchhuahte a tul anga phochhuahna atan hian RCS Office Ground Floor-ah Mizoram VDVK Outlet hi siam a lo ni ta a ni.