Home Ministry atanga thupek angin Mizoram-a Myanmar raltlan chhinchhiahna kalpui mek a ni - CM

Home Ministry atanga thupek an dawn angin Mizoram-a Myanmar raltlan chhinchhiahna chu kalpui mek a ni tih Chief Minister Lalduhoma chuan sawiin, thenawm ram Myanmar leh India Ramri hung chu engtik lai mahin an pawm ngai dawnlo tih a sawi bawk.

USA-a zin mek Chief Minister Lalduhoma hian niminpiah khan Indiana State-a cheng Chin Community te hun a hmanpui na ah zawhna chhangin raltlan chhinchhiahna Biometric Identification chu sawrkar hmasa atanga kalpui a ni tih sawiin, inthlan a hnaih tak avangin tih chhunzawm a ni loh thu leh an sawrkar hnuah raltlan chhinchihahna Portal an enfiahna chuan Portal-a duhthlan tur pahnih an dah chu thil tisual chhinchhiahna leh dan lova lut chhinchhiahna tur anih avangin an pawm ta lo tih a sawi a, Prime Minister hnenah ngenin Home Ministry atangin Portal thar an siam tir leh tih sawiin, raltlan chhinchhiahna chu ramchhung hmun hrang hrangah an kalpui mek tih a sawi a ni.

Chief Minister chuan raltlan te pun chang leh kiam chang awm mahse an inziahluh vek a ngai dawn tih pawh sawiin, raltlante chu a chang leh nupui pasal neiin Kohhran leh YMA-ah member tangkai tak pawh an awm tih a sawi a, tunhnaia MCS Exam-ah ti tha tak pawh an awm tih sawiin, inthliar chu a theih vek loh mahse a theih chinah India sawrkar duhdan an zawm ve zel tih a sawi a. Myanmar leh India ramri hung chu engtik lai mahin an pawm ngai dawn lo tih pawh Chief Minister chuan sawiin, barhluih ramri British ten an siam chu engtik lai mahin an pawm ngai dawn lo tih a sawi a, Sawrkar pathum hnuaia diklo taka thendarha an awm chu pawm harsa an ti tih sawiin, Myanmar leh India inkalpawhna hung tura Sawrkar laipui hmalakna chu engtik lai mahin an pawm ngai dawnlo tih a sawi a ni.

Lalduhoma chuan Chin National Army leh Chin Brotherhood leh ZRA te inkarah inremna awm se an duh tih sawiin, Arakan Army te nen pawh inrem a duh tih a sawi a. Myanmar buaina chu Mizoram-a hnuhluha Lawngtlai thlenga an rawn tihbuai a hlauhawm avangin Arakan Army chu rem a pawimawh thu a sawi bawk.