ZMC-a awm turin Lung zai thiam Doctor biakfel ni tawhin a post siam tum mek a ni

Health Minister Lalrinpuii chuan nimin khan Kolasib District Hospital tlawhin ZMC-a awm turin Lung zai thiam Doctor biakfel a nih tawh thu leh a post siam tum mek a nih thu a sawi.

Nimin-a Kolasib District Hospital tlawhtu Health Minister Lalrinpuii hi District Hospital-a thawktute leh mi pawimawh ten lo dawngsawngin Kolasib District Hospital chu OPD leh IPD a enkawl an neih atanga chhutin Aizawl leh Lunglei tih lohah Mizoram-ah a san ber avanga ngaihtuah ngai bik nia a ngaih thu a sawi a, “Tun aia tam zawk Specialist te kan neih a, Ward pawh mumal zawka kan neih hunah chuan hmundang pan ngai lovin damlo tam zawk in enkawl thei tawh dawn a ni,” a ti a. Kolasib District Hospital a thawktuten mamawh an thlen tam tak chu tih nghal theih a nih laiin a then chu la nghah ngai deuh turte an awm thu a sawi bawk. Health Minister chuan Doctor te lakah mipuiten beiseina sang tak an neih thu sawiin, an tawngkam chu damlote tan damna leh thlamuanna tling a nih thu pawh a sawi a, Chutih laiin Doctor thenkhat ruihhlo avanga hna thawk tha theilo an awm thin nia sawi awm leh zeuh thin chu pawi a tih thu sawiin, Doctor te leh Nurse te chu taima taka an hna thawk chhunzawm zel turin a fuih bawk.

Health Minister Lalrinpuii chuan Health Minister a nih tirh atangin Mizoram Health Care tihchak dan tur a ngaihtuah thu a sawiin, ngaihtuahna a sen hnuah PHC/CHC leh District Hospital-te thuamchak chu thil tul nia a ngaih thu a sawi bawk.

Health Minister hi Kolasib Bialtu MLA leh Assembly Deputy Speaker Lalfamkima'n a a tawiawm a, Kolasib Bawrhsap Robert C. Lalhmangaiha leh Dr. Vanlalsawma, Principal Director, Health & Family Welfare te pawh he hunah hian an tel bawk a ni.

Health Minister hian Chief Medical Officer (CMO) Office leh District Medical Superintendent (DMS) Office te tlawhin damdawi In bulding sak mek a tlawh bawk a, Kolasib a panna kawngah Lungdai PHC leh Kawnpui PHC-te bakah School of Nursing, Thingdawl a tlawh bawk a, Kolasib Vengthar a Urban PHC dahna turte leh Venglai East-a UPHC dahna tur hmunte bakah Social Welfare Department-in Vengthar a Integrated Tribal Development Agency (ITDA) an sakna tur hmun te a tlawh bawk a ni.