Handloom kaltlangin Mizoram-ah mi engemaw zatin eizawnna ngelnghet an nei - C&I Minister

Commerce & Industries Department changtu Minister F. Rodingliana chuan Handloom kaltlangin Mizoram hmun hrang hrangah mi engemaw zatin eizawnna ngelnghet an neih phah thu a sawi.

Sawrkar laipui-a Ministry of Textiles leh Commerce & Industries Department tangkawp in Exhibition Hall, Millenium Centre Rooftop-a National Handloom Day vawi 10-na puala ‘Hathkargha Mela/State Handloom Exhibition’ an buatsaih hawnna nimin-a a hmanpuina ah Commerce & Industries Department Minister chuan Handloom chu kan hnam ziarang phochhuah leh humhimna kawnga hmanraw tangkai tak a nih mek thu a sawi a. Handloom-in hma a sawn zel theih nan kan kutchhuakte chawisan leh ngaihhlut nachang hriat chu mi tin mawhphurhna a nih thu sawiin, hnam ziarang nasa zawka phochhuah a nih theih nan Commerce & Industries Department-a thawktute chuan Handloom lam a tui mite an kaihhruai fo a pawimawh thu a sawi bawk.

Commerce & Industries Minister chuan Sawrkarin kuthnathawk, hlawhtlin tuma beitute tha tichak tura tanpuina pek a ngaih pawimawh thu tarlangin, Handloom lama tui mi, ‘Hand holding Policy’ hnuaia tanpui tlakte dapchhuah leh tanpui dan tur ruahmanna siam turin thawktute a chah a. Mizo kutchhuah Handloom hrang hrang tih hmasawn nan ‘State Handloom Exhibition’ chu hlawhtling taka kalpui turin duhsakna a hlan bawk.

State Handloom Exhibition hawnna hun hi Hunthianghlimi, Dy. Director (Handloom, Textiles & Handicrafts) chuan kaihruaiin Heritage Handloom te’n an kutchhuak thuam chi hrang hrangte phochhuakin entirna hun an hmang a. State Handloom Exhibition-ah hian Stall 60 an in phochhuak a, August ni 14, 2024 thleng a awh dawn a ni.