VC pahnih-ah Electoral Roll thar tlangzarh a ni
Heng VC pahnih-a Electoral Roll thar hi nimin khan Serchhip District Election Officer Paul L. Khuma chuan Serchhip DC Meeting Hall-ah tlangzarhin Electoral Roll ennawn hna chu kan ram leh khawtlang humhalhna atana thil pawimawh a nih thu a sawi a. Hei vang hian Electoral Roll dik leh felfai a awm theih nan kan fimkhur hle tur a ni, a ti a. Party hrang hrang hruaitute leh Media mi te Electoral Roll tlangzarhnaa an tel thei chu lawmawm a tih thu a sawi bawk. Political Party leh VLO te hnenah Electoral Roll thar hi a hlan nghal bawk a ni.
Nimin-a tlangzarh tak Electoral Roll-a a lan danin Serchhip Chhim Veng VC huamchhung ah hian chhungkaw 273 awmin Vote nei mipa 432 leh hmeichhia 443, an vaiin 875 an awm a, Draft Roll tarchhuah hnuah hming thun thar 28 awmin mi 7 paih an ni thung a, Vote nei thei hi za zela 2.46 in an pung a ni.
New Serchhip North Village Council-ah hian chhungkua 479 awmin Vote nei thei mipa 771 leh hmeichhia 826, an vaiin 1597 an awm bawk a, Draft Roll tarchhuah hnuah thun belh awm lovin mi 16 te paih an ni thung a, Vote nei thei hi za zela 0.99 in an tlahniam a ni.
Tarlan tawh angin Serchhip Chhim Veng VC-ah hian General Seat atanga thlantlin C. Lal-dinpuia chu a boral avangin Seat pakhat a ruak a, New Serchhip North-ah pawh hian General Seat atanga thlantlin B. Zaruala chu a boral avangin Seat pakhat a ruak ve bawk a, heng VC Seat ruak hnawhkhahna atan hian State Election Commission chuan by-election a buatsaih dawn a, inthlanna neih hun tur chu a hrana la puan leh tur a ni dawn a ni.