State Tribal Welfare & Development Policy sawiho

State Tribal Welfare & Development Policy chungchang inhrilhhriatna leh inrawnkhawmna hun, ‘Orientation cum Consultation Workshop on State Tribal Welfare & Development Policy, Mizoram' chu nimin khan Aijal Club-ah neih a ni.

Social Welfare & Tribal Affairs, Women & Child Development Department hnuaia State Tribal Resource & Training Centre (STRTC) buatsaih he inrawnkhawmna hun hi Social Welfare Minister Lalrinpuii chuan hmanpuiin a vawikhat nan leh Mizote tana bung thar ni tura Mizoram bik tana Tribal Policy hmawr bawk fel a ni tur chu lawmawm a tih thu sawiin, Tribal-te hamthatna leh hmasawnna kawng dap kawnga inhrilhhriatna leh inrawnkhawmna buatsaih chu ram hmasawnna leh Department hmalakna atan a tangkai dawn tih a sawi bawk.

He hunah hian State Tribal Resource & Training Centre-in State Tribal Policy an lo duan chhin leh mithiam engengemawzat tena an lo chai tawh khaikhawmna tlangpui tarlan niin India rama Tribal-te hmasawnna kalpui a nih dan leh Sawrkar laipuiin India ram danpui hmangin policy leh guideline chi hrang hrang siam tawh mah se, mumal leh awmze nei zawka Mizoram hmathlir 2047 ruahmanna neih a tul avangin State Tribal Policy hranpa nei tura hmalak chhoh a nih thu tarlan a ni bawk.