Governor in Zuangtui-a NIELIT hmun a tlawh

Mizoram Larsap Dr. Hari Babu Kambham-pati chuan nimin khan Zuangtui-a NIELIT (National Institute of Electronics and Information Technology) tlawhin NIELET Director Dr. T. Gunendra Singh leh a thawhpui bakah zirlai naupang ten an lo dawngsawng a. Larsap hian NIELIT building leh hmunhma te fangin Cybersecurity Laboratory, Electronics Laboratory leh IT Laboratory te a tlawh bawk.

Larsap lawmna NIELIT Seminar Hall-a neih ah Larsap chuan NIELIT hi thangkhat lian vel chauhva upa ala ni nâ-in, mi sang tam takin an chhawr tangkai tawh tih a sawi a, Lunglei NIELIT Extension Centre bunfel a ni tawh chu lawmawm a tih thu a sawi bawk. Larsap chuan IT khawvelah kan chen tawh avangin PM Narendra Modi kaihhruai sawrkar laipui pawhin Digital India campaign duangchhuakin, ngawrh takin a kalpui mek tih a sawi a. Kum 2047 ralhma ngeia India ram chu ram hmasawn leh changkang (Viksit Bharat) nih tir chu Prime Minister thil tum ber pakhat a nih thu a sawi bawk.

Governor chuan Health, Education leh Agriculture-ah te Digital Technology hian hma-sawnna nasa takin a thlen mek tih sawiin, Digital Technology chuan Telemedicine hmangin hmun kilkhawr tak takah pawh Quality Healthcare a thlen tir ve mek tih a sawi a. “IT leh Electronics in hmasawnna kan rama a lo thlen hi mitin te banphaka dah hi kan tum tlat tur a ni,” a ti bawk.

Governor in NIELIT a tlawhna-ah hian NIELIT thuneitu  te chuan  Artificial Intelligent (AI) Laboratory din chungchang te, NIELIT chu Deem University-a pawm mai tur a ni tawh avanga Ram an mamawh belh chungchang te, LDC hna dil nana NSQF Alaigned Certificate  pawm sak ve tura an duhna te an lo thlen a. Larsap pawhin lo bawhzui a tum thu hrilhin, NIELIT a tlawh hriatreng nan Larsap hian Thingtiak (Lenhmui tiak) chu NIELIT kawt-ah a phun nghal a ni.