Solid Waste Management Bye-Laws, 2018 chu Serchhip-a hmang tan turin a thuphung a pawm a ni

Nimin khan Serchhip Town Sanitation Task Force chu thukhawmin Serchhip khawpui a lo fai zawkna tura bawlhhlawh sawngbawl dan tur ruahmanna sawiho a ni a. Solid Waste Management Bye-Laws, 2018 chu Serchhip a hman tan a nih theih nan a thuphunga pawm a ni.

Serchhip DC Meeting Hall-a Serchhip Town Sanitation Task Force thutkhawm hi District Bawrhsap Paul L. Khuma chuan kaihruaiin Solid Waste Management Bye-Laws, 2018 hman chungchang sawiho a ni a. He dan hi Aizawl leh District khawpui hmun thenkhatah hman mek a ni tawh a. Serchhip District-ah pawh hman a nih ve theihna turin kum 2020 khan hmalak tan a ni a, he dan hman tanna tur notification te pawh DC chuan hemi kum hian a lo tichhuak tawh a. Nimin Meeting-ah hian Solid Waste Management Bye-Laws, 2018 hi Serchhip a hman tan a nih theih nan a thuphunga pawm a ni a. He dan hnuaiah hian bawlhhlawh tawih thei leh thei lo thliarhran dan te; chenna In, Office, School leh Sumdawnna hmuna bawlhhlawh khawnna rate te; mipui mimirte leh chhungkaw tin mawhphurhna chipchiar a awm avangin mipuiah zau zawka inzirtir nise an ti a ni.

He thutkhawm ah hian Green Herd SP Pvt. Ltd chuan Thenzawl-a Plastic bawlhhlawh sawngbawlna hmun, Plastic Waste Management Centre din tur sawifiahin PHE Department te nena thawkhoin Plastic bawlhhlawh lakkhawm te chu he an Centre hian an buaipui dawn a. Serchhip-ah hian VC te chhawk zangkhai a, sum leh paiah mipui phur tihrit belh chuang si loin Bawlhhlawh tawih thei lo khawn an inhuam thu te, bawlhhlawh phur motor in a thlen phak loh hmunah mihring ruaia an kawtkai atanga bawlhhlawh lakkhawm sak te thlenga an inhuam thu an sawi a. Town Sanitation Task Force chuan an rawtna te chu tha tiin UD&PA Deptt. te nen lo sawiho tura tih an ni.

He hunah hian Addl. DC Lalrinzuala hnen atangin District Solid Waste Management Plan ngaihthlak a ni a. Serchhip District chhung khaw hrang hrangah kan bawlhhlawh te mumal taka sawngbawl a nih theihna tura District Administration in ruahmanna leh hmathlir an neih te a chhawpchhuak a. Mizoram District te zingah District fai leh thianghlim ber kan nih theihna tura tan lak an tum dan a sawi a ni.