Serchhip District Hospital Building thar sak tan dan tur ngaihtuah a ni

Serchhip-a District Hospital Building thar sak dan tur chungchang ngaihtuah a thutkhawm chu nimin khan Serchhip-a neih niin Meeting kaihruaitu District Bawrhsap Paul. L. Khuma chuan Hospital sak hi rang taka bultan nghal a nih theihna turin uluk taka ngaihtuahna sen a tul thu a sawi.

Serchhip DC Meeting Hall-a thutkhawm ah hian District Bawrhsap Paul L. Khuma chuan hmasawnna ruhrel lian tham leh mipui vantlang tana tangkai tur project te chu a rang thei ang bera bultan leh thawh zawh zung zung a tul thu a sawi a. Project bul tan tak tak hmaa a inmun chhung a rei thin avangin a tira sum ruahman zat aiin senso a sang chho thin a, hei hian project tihpuitlinna kawngah harsatna a thlen fo thin tih sawiin, Hospital sak hi rang taka bultan nghal a nih theihna turin Meeting a tel te chu uluk taka an ngaihtuahna seng a, hmasawn zawnga ro an rel theih nan tan la turin a chah a. Project tha taka a puitlin theih nan vil leh endik kawngah pawh taimak a tul thu a sawi bawk a ni.

He thutkhawm ah hian District Administration aiawh te, Health & Medical Education Addl. Director te, Serchhip District Hospital leh CMO hotute, P&E leh PHE Department aiawhte bakah Serchhip Town Development Committee, Serchhip NGO Coordination Committee leh Serchhip Joint Action Committee aiawh te telin Damdawi In sak hna thawktu tur (Contractor) te pawh an tel a, Building sak dan tur ruangam chipchiar taka thlirho a ni.

He thutkhawm ah hian Stakeholders te nen a huhoa inrawnkhawmna neih thin a ni dawn tih tarlan niin Hospital design te uluk taka enhoin mipui tan leh Hospital tana tha ber turin a tul anga her rem theih a nih dan te sawi lan a ni bawk a. Serchhip mipui, khawtlang hruaitute leh Department pawhin he Hospital sak bul tan thuai thuai an nghahhlelh thu meeting ah hian uar taka sawilan a ni a. Chief Minister leh Serchhip Bialtu MLA Lalduhoma remtihnain a tira sak dan tur ruahmanna aia changtlung zawka Building design hi duan a ni a, a rang thei ang berin Hospital sak tan dan zawn nghal ni se an ti a ni.

Tarlan tawh thin angin Serchhip District Hospital building thar sakna tur sum hi Power Grid Corporation of India Limited (PGCIL) Corporate Social Responsibility (CSR) fund atanga hmuh a ni a. He project hian a ruhrel dinna mai bakah hmanraw leina tur sum thahnem tak a keng tel a. Inremna thuthlung Memorandum of Understanding hi May 27, 2022 khan Mizoram Sawrkar leh PGCIL ten an ziak a ni. A satu tur atan hian Mizoram State Works Advisory Board chuan Zamzo Engineering Construction and Consultancy, Aizawl chu a thlang a. Hospital building hlui hi thiah zawh a ni tawh bawk.