Serchhip-ah National Deworming Day hman a ni

Naupang kum khat atanga kum 19 thleng te hnena Rulhut hlo pek beihpui thlakna hun, National Deworming Day chu kumin atana a vawi hnihna turin nimin khan rampum-ah hman leh a ni.

Serchhip-ah chuan National Deworming Day hawnna hun hi Serchhip ICDS Hall-ah neih niin Serchhip District-a Deputy CMO Dr. Lallawmkimi Chhakchhuak chuan a kaihruai a, he ni hman chhan leh an kalpui dan te sawiin Resource Person, Dr. Lalrinmawia Medical Officer, OST Centre chuan Rulhut avanga naupang in harsatna an tawh theih te leh naupang ten hriselna tha an neih theihna tura Rulhut hlo ei pawimawhna te a sawi bawk a ni.

Serchhip District chhungah chuan Rulhut hlo hi zirna In zawng zawng bakah Anganwadi Centre hrang hrangah pek tur niin ASHA In tinah kalin an pe dawn bawk a, School kal tawh lo te pawh damdawi hi eitir vek tura ruahman a ni a. Serchhip District a naupang rulhut damdawi an pek tur zat bituk (target) chu 22,697 an ni.

National Deworming Day hi kumtin vawi hnih hman thin niin February thla ah a vawi khatna atan hmangin August thla ah a tum hnihna atan hman leh thin a ni a. He beihpui thlakna ah hian kum khat leh kum 19 inkar te chu Rulhut hlo (Tab. Albendazole) eitir vek tur a ni a. Nimin khan Anganwadi Centre leh zirna In hrang hrangah te Rulhut hlo hi eitur niin heta ei ve lo ve chu tun thla ni 16 khian thualnawnna, Mop Up Day hmangin ei tir leh vek tum an ni.