Zirlaite tan Climate Change chungchang inzirtirna nei

Serchhip District chhunga High School zirlai te tan ni 5 awh sik leh sa inthlak danglam nasa in khawvel a nghawng dan inzirtirna chu nimin khan Govt. Serchhip College-ah zawhfel niin Art Exhibition neih nghal a ni bawk.

Department of Science & Technology-National Council for Science & Technology Communication (DST-NCSTC) leh Mizoram University bultuma neih ‘5-day Workshop on Towards a Climate resilient Society – Sensitization of Climate change to the society through the intervention of visual art in Mizoram, India’ hi Govt. Chhiahtlang High School, Govt. Keitum High School leh Govt. Serchhip High School-ah te nikhat zel hun hman niin MZU, Mizoram State Biodiversity Board leh Govt. Serchhip College-a mi thiam ten zirtirna an pe a. Nimin khan Govt. Serchhip College-ah a kharna hun hmangin he hunah hian Art Exhibition neih a ni bawk.

Nimin khan Govt. Serchhip College-a HD. Rosanga Multipurpose Hall-ah Art Workshop neih a ni a, he hunah hian High School zirlai ten Climate change chungchang zirtirna an dawn te Visual Art hmanga phochhuah dan Freelance Artist Francis Lalramdinngheta’n a zirtir a. He Workshop-a an kutchhuak te leh Govt. Serchhip College Art Club member te kutchhuak hmang hian Exhibition hi neih nghal niin he Exhibition-ah hian High School zirlai te kutchhuak 43 leh Govt. Serchhip College Art Club te kutchhuak 11 phochhuah a ni.

He project hnuaiah hian District hrang hrang pali-a High School thlan bikah Seminar hi neih tur a ni a, zirtirna pe turin Mizoram chhung leh pawna Science zirna leh Research Centre-a thawkte sawm thin an ni. He project-in a ken tel, Visual Art hmanga sik leh sa danglam zel chung-chang phochhuah dan hi Mizoram Academy of Arts, Aizawl-a zirtirtu ten an zirtir thin thung a ni.