Sawhthing tâm laka beihpui thlakna turin 'Operation Ginger-2024 Fehchhuah Runpui' nei tan ta

Sawhthing tâm buaipui tur leh a natna enkawl dan inzirtira fehchhuah runpui 'Operation Ginger -2024 Fehchhuah Runpui' chu nimin khan Horticulture Department hmalakna in kalpui tan a ni a, nimin khan District 4- Aizawl, Serchhip, Hnahthial leh Saitual District-a feh chhuak turte vailiamin hmalak tan nghal a ni.

'Operation Ginger -2024 Fehchhuah Runpui' hnuaia heng District pali-a fehchhuak turte hi nimin zing khan Directorate of Horticulture Office, Aizawl atangin Minister Prof. Lalnilawma chuan a vailiam a, Sawhthing tâm avanga mangang loneitute tanpui tura fehchhuakte chu theihtawp chhuah tura chahin, a hralhna market thlen hma, a chin leh enkawl chhung zawng chu Department kutah thui tak a innghah tlat avangin thlai chinna hmunah ngei loneitu harsatna enfiahin a remchan dan ang zela puih tum a nih thu a sawi a. Sawhthing quintal nuai 10 chuang thar thei tura beisei a nih thu leh Operation Ginger chu hmalak tawhnate tun aia zau zawka kalpuina tur a nih thu tarlangin, he hmalakna hian Sawhthing chingtu harsatna tawkte tanpui turin Horticulture Department thawktute an awm reng dawn tih a entir thu a sawi a. Loneitute pui turin Department thawktu a te ber atanga Minister thlenga an inpeih reng thu sawiin, harsatna leh mamawh an neihte inthlahrung hauh lova thuneitute hnena thlen zel turin a chah bawk.

Horticulture Minister chuan Horticulture Department chu Sawrkarin thlai thar lei tura a thla chhuah 4 zinga 3- Sawhthing, Aieng leh Hmarcha te changtu Department a nih thu leh Hand Holding Policy tihlawhtling tura mawhphurhna sang tak nei a nih thu sawiin, Sawrkar Flagship programme tihlawhtling tur leh loneitute beiseina a taka thlen tir tura theihtawp chhuaha thawhhopuiah Line Department dangte a sawm a. Media kaltlanga mipuite hmuh theih tura sawhthing tâm leh thlai enkawl dan inzirtirna neih a ni leh a hlawhtlinna pawh hmuh zel a ni thin chu lawmawm a tih thu a sawi bawk.

Ruahman dan chuan August thla chhung hian Mizoram-a Sawhthing tâmna khuate tlawh-chhuaha, a invenna leh enkawl dan turte zirtirna pek vek hman tum a ni a. Kumin July thla tawp lam atang khan Horticulture Department chuan Sawhthing tâm report dawng tanin hma a la nghal a. District tina DHO te'n report an thehluh atanga hriat theih chinah tun dinhmunah Sawhthing tâm avangin khaw 263-a Sawhthing chingtu chhungkaw 25,102 zinga chhungkaw 6586 te chuan harsatna an tawk a. Operation Ginger 2024 kaltlang hian Horticulture Department-a thawkte chu District tin tuamin an fehchhuak dawn a, heng atan hian Sawhthing natnate, a bawmtu rannungte leh a enkawl dan inzirtirna an nei dawn a. Hemi chungchang ziahna lehkhabu sem nghal zel a ni dawn a, a enkawlna damdawite pawh theih ang angin ngaihtuah mek zel a ni.

Operation Ginger - Fehchhuah Runpui ah hian Dr. Jenny Zoremtluangi, Dy. Director leh a thawhpuite chu Serchhip District tuam tura ruahman niin nimin vek khan Neihloh khaw ramchhunga Tuitam Zau-a Sawhthing hmun-ah kalin kuthna-thawktute hnenah Sawhthing tâm leh natna avanga an harsatna tawh mek lak atanga inven dan leh enkawl dan chipchiar takin an zirtir a. He Operation ah hian Dr Jenny Zoremtluangi, Deputy Director chu Team Leader niin Dr. Vanlalremruati Hnamte, Deputy Director leh Lalrempuia Fanai, District Horticulture Consultant te nen Aizawl atangin Neihloh khua hi an pan a. Department of Horticulture, Serchhip District atangin R. Lalrintluanga, DHO leh a thawhpuite an tel bawk a ni.

Team Leader Dr. Jenny Zoremtluangi chuan Sawhthing chin chu Sawrkar Flagship Programme pawimawh tak pakhat a nih thu a sawi a. Sawhthing tâm buaipui leh a natna enkawl dan zir tura kalkhawm kuthnathawktute chu hun lo la kal zel turah pawh midangte zirtir lehchhawngtu ni tura chahin he hmalakna ah hian Sawhthing chingtute an pawimawh thu a sawi bawk.