PAMRA ten ‘Remna Run Lawi ni’ an hmang

Peace Accord MNF Returnees’ Association (PAMRA) chuan ‘Remna Run Lawi ni’ champha vawi 38-na chu nimin, August 2, 2024 khan an hmang.

India sawrkar leh MNF ten Remna thuthlung an ziah hnuah khan loh theihloh in Rammute chu Bangladesh Chittagong Hill Tracts atangin Mizoram an rawn pan ta tih PAMRA chuan sawiin, August 2, 1986-ah Aizawl khawpui thleng khawmin, Luangmual Berampu tlang, Remna Run-ah an lawilut ta tih an sawi a. Remna Ni-a Cable TV ten Film an tihchhuah tam ber pawh hi August 2, 1986-a Remna Rûn Lawi Ni thlalak a ni nghe nghe tih sawiin, “Remna Run Lawi Ni hi kan ngaih pawimawh em avangin PAMRA chuan Luangmual Remna Run tlang-ah a hriatrenga Lung aphun nghe nghe,” an ti a. “Helai hmuna Monument kan siamna chhan chu- Martar Thlanmual hmun a nih vang leh Remna Run (Peace Camp) awmna a nih vang a ni a. Hei hi thangthar zel ten Zalenna sualtu, a tawp thlenga thawk Mizo Hnam Sipai te kha an la rawn zirchiang zel dawn a, he Monument hi chutiang atan chuan thil tangkai a la ni chho zel dawn a ni,” an ti bawk.

PAMRA chuan ‘MoS (Peace Accord) 30th June, 1986’ chu an ngaihlu hle tih pawh sawiin, Kum 38 liam hnuah pawh an inben-belna tur Inhmun, Mizoram Sawrkarin a la tifel lo chu a tuartu (Victim) tan chuan a rei ngat ngat ta hle tih pawh an sawi a, “Inhmun ber a fel loh avangin Sawrkar laipui atanga Insakna lo kal pawh khawlo takin a kalral ta mai mai a nih kha,” tiin Chaltlang Ram Maumual khu House Site tihfel thuai an duh thu an sawi bawk.

PAMRA ten ‘Remna Run Lawi Ni’ an hman hi an pawl Vice President Lalramghaka chuan kaihruaiin Remna avanga lo haw Hnam sipai 572 te zinga chatuan ram panta mi 227 te sunna hun an hmang bawk a ni.