Mizo nu hnenah ‘National Handloom Award’ hlan

India rama puantahtu leh puantah hmasawnna atana thawk thate chawimawina sang ‘National Handloom Award’ chu nimin khan New Delhi-ah sem niin Vanlalruati, Ramhlun Vengthar, Aizawl hnenah Tribal Weaves Award hlan a ni a. National Handloom Award hi Ccategory hrang hrang ah then a ni a, Mizoram atanga Award dawngtu Vanlalruati hnenah hian ‘Tribal Weaves Award’ hlan niin a puantah 'Senior bit design-a table cloth' atangin he Award hi a dawng a, India Vice President Jagdeep Dhankhar chuan he Award hi hlanin Award hian cheng nuai 2 leh thuziak a ken tel bakah Ministry of Textiles hnuaiah hamthatna hrang hrang pek a ni dawn bawk a ni.

‘National Handloom Award’ hi National Handloom Day vawi 10-na ah sem niin Awardee leh a hruaitute kalman zawng zawng hi sawrkar laipui chuan a tum a, Commerce & Industries Department chuan Delhi-a he Programme hmang tur hian puantahtu mi 6 a tir a ni.