ZPM in thubuai pathum CBI chhui tir turin an ngen

ZPM Legal Department chuan Lokayukta-a case pending mek te chu CBI chhui tura hlan turin Mizoram Lokayukta-ah ngenna an thlen.

Nimin a thuchhuah siama an tarlan danin ZPM chuan Mizoram Lokayukta-a case lian tak tak pending mek pathum Ropeway leh Skywalk chungchang leh NABARD sum puk hmanga Mizoram School thawmthat chungchang te chu ACB ten investigation an la kalpui mek thu leh Lengpui Airport sak chungchanga complaint lut pawh Mizoram Lokayukta ngaihtuah turin a inchiah mek tih an sawi a. Sub-section 5 of Section 19 of the Mizoram Lokayukta Act, 2014 in a tarlan danin Corruption case te chu chhui tura Lokayukta-in Order a chhuah atanga thla ruk (6) chunga zawh tura tih a nih thu leh an zo hmanlo a nih chuan thla thum (3) aia reilo extend anih theih tur thu tarlan a nih thu an sawi a ni.

Hetihlai hian MLC No.37&39 of 2021 (Irregularities in the construction of Ropeway and Skywalk) chu ACB chhui turin nikum May ni 30 khan referred a nih tawh thu leh Vawiin thlenga Investigation zawh a la nih loh thu te, Investigation Period, danin a bituk hun a liam tawh thu te an sawi a. MLC No. 41 of 2022 (Misappropriation of NABARD loan for renovation of schools in Mizoram) chu kumin February ni 13 khan ACB chhui turin hlan a nih tawh thu leh MLC No. 42 of 2022 (Mismanagement in the renovation works of Lengpui Airport) chu NGO pakhat Mizoram First te chuan March ni 14, 2022 khan Lokayukta-ah Complaint an lo thehluh tawh thu an sawi a, Investigation result mumal tak Vawiin thlengin a la awm lo nia an hriat thu an sawi bawk a ni. ZPM Legal Department te chuan heng Case te hi mipui sum tam tak tihchingpenna ni ngei ah an ngaih thu an sawi a, CBI ngeiin chhui se an duh thu an sawi a. “CBI hnena refer tur hian consent pek a ngai a nih pawhin ZPM kaihhruai Mizoram sawrkar chuan consent pawh hi a pek nghal ngei a rinawm,” an ti bawk.