Ration Card Var tan buhfai man tlawm bo in Ration Card enfiah hna thawh a ni dawn

Food Civil Supplies & Consumers Affairs Department changtu Minister B. Lalchhanzova chuan Ration Card var neite tana sawrkarin buhfai man-a subsidy a pek thin chu tihtlem a ni dawn tih sawiin, Chief Minister, Minister, MLA leh Group ‘A’ Officer te tana Buhfai Quata tihtawp tum a nih thu a sawi bawk.

Nimin-a Aizawl Press Club-a thuthar thehdarhtute a kawmna ah Supply Minister B. Lalchhanzova chuan National Food Security (NFSA) kaltlanga buhfai kan dawn te leh kan State puala buhfai kan lei dan tarlangin, Ration Card Eng Antyodaya Anna Yojona (AAY) te hian thla khat ah buhfai kg. 35 a thlawna dawngin Card Pawl Priority Household (PHH) te hian mipakhat zelah kg. 5 a thlawnin an dawng a, kg. 3 chu kg. khat ah Rs. 15 hisap’in an khul ve thin thu leh Card var hmang te hian kg. khat Rs. 15 in mi pakhat tan kg. 8 an khul thin tih a sawi a, thlatin hian Buhfai quintal 97,000 vel kan chawlut in, Food Security Scheme hnuaiah Quintal 37,000 vel a thlawna dawngin, a man tlawm tied over 14,900 velin kan lei bakah, Open Market Procurement hmangin thla tin quintal 44,000 vel chu quintal khat ah Rs. 4,000/- a kan lei thin thu a sawi bawk.

Hei vang hian sawrkar-ah rawtna te siamin June 18, 2024-a Cabinet Meeting chuan, “Chief Minister, Minister, MLA leh Group ‘A’ Officer te tana Buhfai Quata kan lei thin hi tihtawp ni se, hmahruai ila, khawsak harsa lemlo te pawh ngen chhoh zel nise,” an tih thu leh Buhfai kg. khata subsidy Rs. 25/- an pek thin chu Rs. 10/- ah tihniamin Card var hmangtu ten Rs. 15/- a an khul thin chu Rs. 30 in an khul tawh ang tih a sawi a, hei bakah hian Retailer lawmmanbuhfai kg khata Rs. 0.50 ni thin pawh Rs. 1.50 ah tihsan a ni tawh ang tih a sawi a, Retailer te lawmman hi NFSA bikah Centre in Quintal khat zelah Rs. 135 a tum sak bakah State in Quintal khat-ah Rs. 45 a lo tum ve thin thu a sawi a. “He subsidy ennawn hian NFSA dawngtu Card Eng leh Card Pawl hmang te a nghawng ve dawnlo a ni,” a ti bawk.

He hmalakna avang hian sawrkarin thla tin Rs. 5,25,93,072/- humin kum khatah chuan Rs. 63,11,16,864/- a huam thei dawn tih Minister chuan sawiin, “He hmalakna hi kalpui ta lo ila kum khata kan senral tur chu cheng vbc. 135 vel a ni anga, he hmalakna avangin cheng vbc. 80 velin kan buhfai mamawh hi kan in enkawl theih a beiseiawm a ni,” a ti a, “He hmalakna avang hian mipui ten bufai buk dik an lak theih phah ngei kan beisei,” a ti bawk.

Supply Minister chuan Mizoram-ah Ration Card nei mek mi 2,88,757 awmin mihring 11,72,378 a huam thu a sawi a, heng te hi Food Security dawng thei Ration Card 1,76,471-a mi 7,06,296 leh Card var hmang mek Ration Card 1,12,174 atangin mi 4,65,708 anih thu a sawi a, NFSA dawng thei hi ram pumah 60.22 % leh a huam ve loh 40 % vel kan nih thu a sawi. Food Security a awm tur thlan dan hi ramri kham mumal a harsat thu pawh sawiin, “Khawpuia cheng kum khata an chhungkaw sum lakluh cheng nuai 4 tling zo lo te chu Food Security-ah hian rinlut ila, Thingtlanga cheng kumkhata an sum lakluh cheng nuai 2.5 tling lo te pawh Food Security-ah hian rin lut ila ti a hmalak chhoh mek a ni,” a ti.

NFSA dawng thei zingah dinhmun tha te zawnchhuaha, Card vara awm tirin Card var hmang mek miharsa te NFSA a thunluh beihpui thlak a ni dawn tih pawh Minister chuan a sawi a, “Ration Card hi Economic Status tehna pawimawh tak a ni chho a, Health Care, Ruang phurh, Golden Card etc ah te NFSA a awm hi dinhmun harsa te tan thil hlu tak a ni,” a ti a. Hemi atan hian Veng tin leh khaw tina Food Security Committee te kaltlangin leh Consultant te vil puina in NFSA hi ennawn chhoh a ni ang tih a sawi.

Ration Card Var tana Buhfai man thar tur hi kumin (2024) October thla atanga hman tan tum a nih thu a sawi bawk.