Awlsam zawka Tax chhunluh theih nan hmalak a ni

Taxation Minister Dr. Vanlalthlana chuan sumdawnna hrang hrang kaltlanga awlsam zawka Tax chhunluh a nih theih nan hmalakna kalpui mek a nih thu a sawi.

GST Rising Day vawi 7-na lawmna nimin July 1, 2024-a Taxation Department Auditorium-a neih a hmanpuina ah Taxation Minister chuan khawtlang leh ram tihhmasawn nan Chhiah tlingkhawm chu tangkai taka hman thin a nih thu sawiin, Chhiah pek ngaih pawimawh kawng ah inzirtirna uar zawka kalpui a tul thu a sawi a. Chhiah kan pek hi keimahni tan, kan khawtlang leh ram tan a hmasawnna hna thawh nana hman thin a nih angin, Chhiah lak khawmte chu chhiah petute tan bawk a hman thin a ni tih kan hriatchian hmasak a tul thu a sawi. Taxation Minister chuan Goods & Services Tax lakkhawm kawngah Taxation Department-in hma a sawn zel theih nan thawktu indaihlohna phuhru turin hmalakna kalpui mek a nih thu sawiin, Sumdawnna hrang hrang kaltlanga awlsam zawka Tax chhunluh a nih theih nan hmalakna kalpui mek a nih thu a sawi a, Chhiah lakkhawm kawnga Taxation Department-a thawktute hmalakna chu lawmawm a tih thu a sawi bawk.

GST Rising Day lawmna ah hian ‘Strong Enterprise, Comprehensive Development’ tih chu thupui-ah hman niin Taxation Department changtu Secretary SM Ali chuan Taxation Department chu ram siamthat nana thawktu pawimawh tak an nih thu te, Tax pek pawimawhna leh Tax pek dan kalhmang mipuite hnen h zirtirna an pek thin thu te sawiin, GST hman tan a nih atangin chhiah tlingkhawm pawh a pun chhoh zel thu a sawi a. GST kalphung leh GST hman tan a nih atanga chhiah lakkhawm dan dinhmun te Malsawmtluanga IRS, Joint Commissioner, CGST chuan a tarlang bawk a ni.

He hunah hian Taxation Department hnuaiah post ruak engemaw zat awm te hnawhkhah nan hmalak mek a nih thu te, Chhiah lakkhawmna kawnga hna sawt zawka thawh a nih theih nan District thenkhat a Taxation department hmunhma te pawh changtlung zawk a thawmthat tum a nih thu te sawilan niin kum 2023-2024 chhung a chhiah lakkhawm hi a vaiin cheng vbc. 1112 vel niin GST kaltlangin cheng vbc. 970 vel lakkhawm a ni tih tarlan a ni a. Tax lakkhawm zawng zawng atangin GST atanga dawn hi za zela 87 vel a ni.