Leimin vangin mi 3 an thi

Nimin zing khan Zemabawk High School Veng-ah leimin in chenna In pakhat chhilhin mi pathum an thi a, nimin vek khan an ruang te hi hmuh nghal vek a ni.

Thudawn danin nimin zing dar 6:00 rik hma hret khan Zemabawk High School Veng-a F. Lalrokima te chenna In chu a chhaklam a leimin hian a chhilh a, he In-ah hian In neitu Lalrokima te nupa nen mi 8 chengin Lalrokima fapa Isaac Chhangte (32) leh a nupui Lalrinchhani (25) leh an fanu Abigail Lalchhanhimi (4) te chu leimin hian chhilhin midangte hi an him thung a ni. Heng mi pathum te ruang hi nimin vek chawhma dar 11:00 vel khan lakchhuah niin nizan khan lumen a nih hnuah Vawiin hian vuiliam an ni ang.

Nimin zing vek khan Aizawl Zuangtui Veng-ah leimin in chenna In pathum a hnawl bawk a, he In hi chhungkaw pali te luahlai niin mihring thi leh hliam an awm lo thung a. Hei bakah hian Mizoram hmun hrang hrangah leimin awmin leimin avanga inkalpawhna lama harsatna thleng pawh a awm zeuh zeuh bawk a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man