Kum 2022 hnu lamah ruang chhar 135 zet awm tawh

Kum 2022 atanga kumin April thla tawp thleng khan Mizoram-ah mipa ruang chhar 126 leh hmeichhe ruang chhar 9, a vaiin 135 a awm tawh.

Police hotute sawi danin hemi hun chhunga ruang chhar zinga mipa 4 leh hmeichhia 2 chu tunge an nih hriat loh an ni a, hemi chhung vek hian ruhro pahnih chhar a ni bawk. Chhinchhiahna atanga a lan danin kum 2022 khan mipa ruang chhar hi 60 an awm a, hmeichhe ruang chhar 3 an awm bawk a. Nikum chhung khan mipa ruang 46 leh hmeichhe ruang 5 chhar a ni a. Kumin ah January leh April inkar khan mipa ruang 20 leh hmeichhe ruang 1 chhar a ni bawk.

Kum 2022 atanga kumin April thla inkar chhung vek khan Mizoram-ah mahni intihlum mi 236 an awm a, an zinga 200 hi mipa niin midang 36 hi hmeichhia an ni thung a. Tunhma atang tawh khan mahni intihlum zingah hian hmeichhia aiin mipa an tam zawk ziah niin Police hotute chuan an sawi. Kum 2022 leh kumin May thla inkar chhung khan lirthei chesualah mi 266 an thi tawh bawk a, kum 2022 khan lirthei chetsual vanga thi mi 117 an awm a, nikum khan mi 96 thiin kumin January atanga May thla tawp thleng khan mi 53 an thi tawh bawk a ni.