Kal dan phung pangngai thlak danglama dan hnuaiah thlirna thar nen hmasawnna hnathawh a tul - DC Serchhip
Serchhip District Bawrhsap thar Paul L. Khuma hian nimin khan Serchhip DC Meeting Hall-ah MJA Serchhip District Member te kawmin Serchhip District tana a hmathlir leh a ngaih pawimawh hrang hrangte a sawi a. Bawrhsap chuan Computer leh Internet behchhana rang leh awlsam zawka inrelbawlna kalpui theihna tur Digital District leh Environment humhalh zawnga sawrkar leh mipui inrelbawlna kalpui Green District te chu a hmathlir a nih thu a sawi a. Digitization chu sawrkar hna a thawhna hmasa lamah an lo kalpui tawh thu leh Serchhip District-ah pawh an kalpui thei dawn em tih chu a ngaihtuah thu a sawi a. Heng bakah hian Sawrkar department hrang hrang te leh mipui ten District hmasawnna tura thawhhohna - Convergence mumal taka an kalpui theih dan tur kawng dap te; kal dan phung pangngai thlak danglama dan hnuaiah vek ngaihtuahna leh thlirna thar nen District hmasawnna hnathawh tul a tih thu te a sawi bawk a ni.
Serchhip District Bawrhsap chuan khua leh tui ten sawrkara an harsatna leh vuivaina an thlen theihna tur leh an chanvo te an zawhfiah theihna tur Mipui Aw (mipuiaw.mizoram.gov.in) hman tangkai thiam a tul thu pawh sawiin, mipui mimirin sawrkar hnathawh an vil (monitor) theihna tur kawng a buatsaih, Mizoram Right to Public Services Act te chu mipuiin tangkai lehzuala an hman thiam a ngai tih a sawi a. Awmze nei zawka sawrkar hnathawk ten hna an thawh theih nan Result Framework Document (RFD) te pawh Serchhip District-ah hman theih a ni dawn em tih an zirchian mek thu a sawi bawk a ni.
Hei bakah hian Bawrhsap chuan Officer ten Adopted Village neih chungchang pawh a ngaihtuah thu sawiin, Education leh Health Sector-a kan hnufual zualna khua te chu SAGY kalpui dan angin Officer ten Adopted Village-ah thlangin tuna hmalak nghalna tur leh hun rei zawka hlawhtling thei tura hmalakna kalpui tha a tih thu a sawi a. Sawrkar Department ten hun bituk chhunga an hmalakna tur ruahmana a hlawhtlin dan enfiahna nei leh thin tura kalpui ve dan a awm em tih te pawh an zirchian mek thu a sawi bawk a ni.
Bawrhsap chuan an hmalakna thenkhat tarlangin, tunhnaia ruahsur avanga chhiatna thleng hrang hrangah Zonal Officer ten anmahni Bial theuh uluk taka vilin SDRF norms angin chhawm-dawlna pawh pek nghal zel a nih thu a sawi a, Quick Response Team (QRT) te pawh indin thar leh a nih tawh thu sawiin, National Highway laih avanga lungawilohna la awm te pawh a hmunah enfiahin Contractor, thutawp siam thei turte kokhawma hmalak tum a nih thu te a sawi a. Thuthar thehdarhtute chu mipuite sukthlek her danglam thei khawpa thiltithei an nih dan sawiin, District hmasawnna atan theihtawp chhuah chhun-zawm zel tur leh thawhhona tha tak an neih ngei a beisei thu a sawi bawk a ni.
He hunah hian MJA Serchhip District Member te pawhin Bawrhsap hnenah hian Cyclone Remal vanga chhiatna thleng chungchang te, NH-54 kawng laihin a nghawng chi hrang hrang te, Vawkvulhtu ten ASF avanga mang-anna an tawh mek te, ruihhlo do chungchang te leh khawtlang tana thil pawimawh an vei zawng te DC hnenah hian an thlen nghal a. Bawrhsap hi SDO (Sadar) Rebecca Laldin-mawiin Hrahsel, Settlement Officer Gaston Vanlalhriatpuia leh DIPRO Lalnunmawii ten an tawiawm a ni.
Comments
Post a Comment