Damdawi In tha ah tling leh

India ram Hospital tha bik tehna, NQAS Certification chu Mizoram-a District Hospital pathum - Civil Hospital Aizawl, Civil Hospital Lunglei leh Champhai District Hospital bakah Urban Primary Health Centre pakhat, ITI UPHC te hnenah hlan a ni a, heti hian Mizoram-ah NQAS Certified facility pariat a awm ta a ni. National Health Mission (NHM) Mission Director Dr. Eric Zomawia chuan Mizoram-ah India ram-a damdawi In tha bik a thlanchhuah a awm zel chu mellung pawimawh tak a nih thu sawiin, hetiang ang hlawhtlinna neih anih theihnana thawktu zawng zawng te inpekna leh thawhho thatna te avangin lawmthu a sawi a ni. 

Damdawi In tha a tling tur hian District Level, State Level leh National Level atangin tehna hrang hrang paltlang a ngai a. Civil Hospital Aizawl leh Lunglei hian za zela 94 leh 93 hmuin Premium-ah an tling a, Champhai leh ITI UPHC hian za zela 87 leh 85 an hmu bawk. Damdawi In tha tehna-ah hian tehfung hrang hrang 2000 chuang a awm a ni. Hetiang ang NQAS Certificate hi Mizoramah PHC pathum leh Urban PHC pakhat hnenah hlan an lo ni tawh a ni.