CM in Union Minister kawm

Chief Minister Lalduhoma chuan nimin khan DoNER Minister Jyotiraditya Scindia chu a Office-ah hmuin thu pawimawh tak tak an sawidun a, North Eastern Council thuneihna tihpun chung-chang te leh project hrang hrang chungchang te pawh sawiin, Jyotiraditya Scindia hian DoNER hnuaia project hrang hrangte enfiah turin Mizoram a lo tlawh vat tur thu a lo hrilh a, Kaladan Multi-Modal Transit Transports Project pawh a hmunah ngei a tlawh a tum tih a lo sawi a ni.

Hemi hnu hian Chief Minister hian Union Minister of Environment, Forest and Climate Change Bhupender Yadav chu a Pisa-ah hmu bawkin Mizoram chhunga project hrang hranga Forest Clearance hmuh theihloh avanga harsatna awmte leh a chinfel dan tur kawngte an sawidun a, Minister hian harsatna awm te chu chinfel pui vat a lo tiam a ni.

Chief Minister Lalduhoma hian nizan hmasa khan Union Health Minister JP. Nadda chu a chenna In-ah kawmin Delhi-a a zin hmasak ber tuma an lo sawi dun tawh ZMC tihchang-tlunna tur sum leh pai tanpuina chungchang a sawichhuak leh a. Union Health Minister hian tihfel vat a lo tiam tih sawrkar thuchhuah chuan a tarlang a. ZMC a Critical Care Block din chungchang te pawh sawi dunin Health Minister hian an lo zirchian tur thu leh chanchin a hriattir leh vat tur thu a lo hrilh a. Health Sector a Mizoram hmasawnna thil te an sawidun bawk.