ASF vangin kumin ah Vawk 1247 a thi tawh
Serchhip-a AH&Vety Department atanga thu kan dawn danin nimin khan Serchhip District-a khaw 8-ah ASF vanga Vawk thi 25 awm lehin East Lungdar-ah Vawk 7 thiin Baktawng-ah 5 leh Thenzawl-ah pakhat a thi a, Serchhip khawpui chhungah Vawk 12 thiin New Serchhip South-ah 6 leh Chanmari leh Field Veng-ah 2 ve ve thiin Hmar Veng leh Vengchung-ah vawk pakhat ve ve a thi bawk. Nimin vek khan Khua leh Veng 10-ah Vawk 59 suat a ni bawk a, P&E Veng-ah 13, Serchhip Kawnpui North-ah 12, Baktawng-ah 11 leh Khumtung-a 9 suat te chu nimin-a Vawk suat tam zualna a ni.
Inrinni khan Serchhip District-a Veng leh khua 7-ah Vawk thi chhinchhiah 21 awmin Chhiah-tlang leh East Lungdar-ah 7 ve ve a thi a, Serchhip Chhim Veng-ah pathum thiin Serchhip a Veng dang pali-ah Vawk thi pakhat theuh a awm bawk a. Inrinni vek khan Veng leh khua 11-ah Vawk 83 suat a ni leh bawk.
Chhinchhiahna atanga a lan danin kumin hian Serchhip District-a Veng leh khua 26-ah ASF vang hian Vawk thi 1247 awm tawhin Vawk 3328 suat a ni tawh bawk a, chhungkaw 951 in harsatna hi tawkin Vawk hri leng avnga Vawk thi hi a la awm deuh reng a ni.