YMA in Thenzawl-a 'Fresh Water Fish Brood Bank' leh Serchhip DIET Hostel sak mek an enfiah

Thenzawl Fish Farm-a Sangha dahna tur, 'Fresh Water Fish Brood Bank' siam mek leh Serchhip Chanmari Veng-a DIET Hostel sak hna thawh mek chungchang chu Serchhip Sub-Hqrs. YMA chuan thuneitute hnenah thlen an tum thu an sawi.
Serchhip Sub-Hqrs. YMA Vigilance & Monitoring Committee Vantawng Group YMA hruaitute chuan nimin khan Thenzawl Fish Farm-a Sangha pui dahkhawmna leh Sangha inthlahpunna 'Fresh Water Fish Brood Bank' siam hna thawh mek chu tlawhin an enfiah a, helai hmuna hnathawh tawh te chuan duhthu a sam lo hle nia an hriat thu leh hnathawh te pawh a tha tawk lo nia an hriat thu an sawi a. Sangha dahna tur Dil (Pond) hrang hrang siam tawh te bakah Construction Work dang te chu RTI hmanga zawhna chhanna an dawn atanga Estimate Amount cheng nuai 380 atanga chhûtin a tha tawk lo nia an hriat thu an sawi a ni.

'Fresh Water Fish Brood Bank' hi Pradhan Mantri Matsya Sampada Yojana (PMMSY) hnuaia sum hmuh hmanga siam niin Departmental Work-a thawh a ni a, PMMSY Nodal Officer (Assistant Director of Fisheries) leh Department-a Junior Engineer (JE) in an vil tih YMA te chuan sawiin, hna tan atanga thla 12 chhunga zawh hman tura ruahman niin hemi ang hian kumin July emaw, August thlaah emaw zawh theih beisei a ni tih an sawi a. Helai hmuna hna thawh mek hi tun aia tha zawka thawh chhunzawm a nih theih nan uluk zawka vil chhunzawm an tum thu sawiin, tun dinhmuna an lungawi lohna te pawh Mizoram Sawrkar-in Sawrkar sum hmanga Project thawh te viltu tura a din, Mizoram State Project Monitoring Committee hnenah thlen ni se an ti bawk.

Serchhip Sub-Hqrs. YMA Vigilance & Monitoring Committee te hian nimin chawhnu khan Serchhip DIET Hostel sak tun thlenga zawhfel loha la awm reng chu a hmunah an tlawh bawk a, DIET Hostel hi Samagra Shiksha Mizoram (2019-2020) PAB Fund atanga sak niin Rs. 2,15,01,309.38 senga sak tur a ni a, kum 2021 atanga sak tan tawh kha niin hri leng avangin a sak zawh hun tur hi sawn a nih hnuah January 2023-a sa zo tura tih an ni a. Tunah hian sak zawh la ni lovin luah theih tura sa zo tur chuan hna thawh tur tam tak ala awm niin YMA Sub-Hqrs. chuan an sawi a ni. Serchhip Sub-Hqrs. YMA hruaitute chuan he Hostel sak ah hian Contractor chu Allied Concern an nih laiin a thawktu tak chu midang niin an sawi a, he hna enkawltu hian sum awm loh avangin hna a thawk chhunzawm thei tawh lo nia a sawi thu an sawi bawk. Serchhip Sub-Hqrs. YMA hruaitute chuan Hostel satu hian sak chhunzawm a tum tawh lo nia a lan avang leh a bungrua te pawh lachhuaka hun rei tak hna a thawh tawh loh avangin Contractor in hna a zawhfel ngei theihna turin Chief Minister hnenah thlen nise an ti bawk.