Serchhip District-ah ASF in hluar lam pan zelin Vawk hri lenna hmunah khaw 2 puan leh a ni
Serchhip District chhunga North Vanlaiphai leh Keitum khua ah hian tunhnai khan Vawk thi a awm nual a, heng te hi PCR hmanga Sample enfiah a nih hnuah ASF vanga thi an ni tih finfiah a ni a, hei vang hian hri darh zel lohna turin heng khua te hi nimin, June 18, 2024 atang khan Serchhip DVO Dr. H. Vanlalrawna chuan Vawk hri lenna hmun, Infected Area-ah a puang ta a ni. Heng khua atang hian Vawk, Vawksa leh Vawksa atanga thil siam reng reng lakchhuah leh lakluh khap niin Vawk talh leh Vawksa zawrh pawh khap a ni a, Vawk thi reng reng paih mai lovin Chinai/Disinfectant nena phum tura tih niin Vawk thi a awmin AH & Vety Department Official te hnena hriattir vat tura tih a ni bawk.
North Vanlaiphai khua ah hian ASF vanga Vawk thi hi 61 zet a awm tawh nia chhinchhiah a nih bakah Vawk 16 te chu hri leng darh zel tur venna atan suat a ni tawh bawk a, Village Council in Vawk thi phumna tur hmun ruahmanin khawl hmangin Vawk phumna tur hi laih nghal a ni bawk a. Keitum khua ah hian ASF vanga Vawk thi pahnih awm tawh anga chhinchhiah niin vawk suat 42 a awm tawh anga chhinchhiah a ni bawk.
Heti hian nimin thleng khan Serchhip District-a chhunga khaw 7-ah ASF vanga Vawk thi 195 zet awm tawhin vawk 1325 suat a ni tawh bawk a. Chhingchhip khua ah Vawk 32 thiin 1041 suat a ni tawh a, Khumtung khua ah Vawk 60 thiin 184 suat a ni tawh bawk a, Baktawng khua ah Vawk 27 thiin 20 suat a ni tawh bawk. Hualtu khua ah Vawk thi 3 awm tawhin 12 suat a ni tawh a, Chhiahtlang-ah Vawk 10 thiin 4 suat a ni tawh bawk a, Keitum khua ah Vawk 2 thiin 48 suat a ni a, North Vanlaiphai-ah Vawk 61 thiin 16 suat a ni tawh bawk a ni.
Hetihlai hian AH&Vety Department chhinchhiahna atanga a lan danin nimin khan Mizoram hmun hrang hrangah ASF vangin Vawk 100 a thih leh bakah Vawk 289 suat a ni leh bawk a, ASF vang hian kumin January thla atanga nimin thleng khan Mizoram-ah Vawk 2357 thi tawhin Vawk 4961 zet suat a ni tawh bawk a ni.
Comments
Post a Comment