Nikum aiin kumin a Meth man a tam tawh zawk

Excise & Narcotics Department chuan nikum (2023) chhunga Methamphetamine an man aia tam kumin kum chanve chhungin an man tawh.

Mizoram Excise & Narcotics Department hian nikum chhung khan Methamphetamine kg 99.506 zet an man a, kumin ah hian February thla thleng khan kg. 96.485 zet an man hman thung a, March thla hnu lamah erawh man tam lutuk awm lovin May thla tawp thleng khan kg. 112.528 zet man hmanin nikum-a an man aia tam zawk kumin-a thla nga (5) chhungin an man hman a ni. Excise & Narcotics Department chhinchhiah danin kum 2020 leh 2021-ah te Mizoram-ah Methamphetamine man hi a tam lo a, kum 2020-ah kg. 45.547 manin kum 2021-ah kg. 12.268 an man a. Kum 2019-ah khan kg. 146.129 manin hei hi kum 2019 atanga 2023 thlenga an man tam ber kum a la ni.

Excise & Narcotics Department chuan Mizo thalaite chu Methamphetamine lakah hian an la him nia an hriat thu sawiin, Mizoram-ah man tur awm ve reng mah se Mizoram-a an man hi hmun danga mi tur a ni thin tih an sawi a, khawchhak lam atangin khawthlang lam hmun hrang hrangah an la a, Mizoram hi a kawng a nih avangin man tur pawh a awm thin nia hriat a ni a, Mizoram a rawn lut hi India ram State thenkhat leh Foreign te pawh a thlenga hriat a ni a, Bangladesh-a lut te pawh awmin, chuta tang chuan Middle East lama thawn te pawh a awm nia hriat a ni.