Mizoram-ah raltlan rawn lut 44,778 an awm mek

Myanmar leh Bangladesh atanga raltlan bakah Manipur atanga sahimna zawng mi 44,778 te Mizoram-ah an awm mek.

Home Department hotute sawi danin Mizoram-ah Myanmar atanga raltlan mi 33,926 an awm mek a. February ni 1, 2021-a sipaiin an ram rorelna an hnehchhuh atanga tlanchhiaa Mizorama awm zui ta an ni hlawm a, tunhnai thleng khan lo chhuk an la awm reng a. District zawng zawng 11-ah  mipa 10,177 leh hmeichhia 10,905 leh naupang 12,844 an ni a. Myanmar raltlan 9,987-te hi Relief Camp 111-ah awmin mi 9,905 chu an chhungkhat laina te emaw thiante bulah emaw anmahni inluahah emaw an khawsa a ni.

Bangladesh Chittagong Hill Tracts atanga rawn tlanchhiate hi Lawngtlai District-ah vek an awm tih Home Department hotute chuan an sawi a, tunah hian mi 1,901 an awm mek a, an zinga 596 hi mipa niin hmeichhia 499 leh naupang 806 te an ni. An zinga engemawzat hi Lawngtlai District-a Relief Camp 12-ah awmin a dangte chu khaw 11-a an chhungte leh thiante belin an awm a ni. Bangladesh atanga raltlan rawn lutte hi Bawm hnam an ni ber a, anmahni chuan Kuki-Chin an inti a, Kuki-Chin National Army (KNA)-in Chittagong Hill Tracts-a an chenna hmuna thuneihna sang zawk an ngiat avanga Bangladesh Sipai te nena an inkah avanga rawn raltlan an ni.

Nikum May ni 3 atanga Manipur-a chi leh chi inkara tharum thawhna avanga sahimna zawnga Mizoram-a rawn lut a awm mek hi mi 8,951 an ni a. An zinga mi 1,294 te hi Relief Camp 23 ah awmin mi 7,657 te chuan an chhungkhat laina leh thiante an bel a, Hnahthial leh Lunglei District-ah Manipur atanga raltlan an awm ve lo a ni.