Khawtlang huapa ruang zawn tihtawp a ni ta

May ni 28, 2024-a Cyclone Remal kaih-hnawih leiminin a hnawl, an ruang la hmuh lohte zawn hna thawh chu Mizo dan-a ni 7 chhung neih a nih hnuah nimin khan khawtlang huapa zawn chu tihtawp a ni ta.

May 28-a Leimin nasa takin In leh mihring a hnawl avanga chin hriatloh a awm te zawn hna hi Central YMA huaihawta thawh a ni a, ni 6 chhung zawn a nih hnuah nimin khan Central YMA ruahman angin ruang la hmuhlohte hi zawn chhunzawm a ni a. Nimin bikah Aizawl khawpui chhung leh a chhevela YMA Branch 20 chu Central YMA ruahmannain hmun hrang hrang ah thawk lehin nimin tlai dar 4:00 khan khawtlang huapa a zawn hna chu tihtawp a ni ta a ni.

May ni 28-a Cyclone Remal in a thlen ruahsur nasa avanga leiminin a hnawl zingah hian ruang 29 hmuh ani tawh a, nimin thleng khan mi 5 te chu hmuh an la ni lo a, heng an ruang pawh hmuh tak loh te hi Melthum atangin Lalthakima (42); Deborah Lallawmawmi (11); Lalvenhima (8) leh Ramdinsangi (Thla 6) bakah Aibawk-a Matthew Lalchhanhima (34) te an ni.

Heng ruang hmuh zawh tak loh te zawn kharna hun hi Melthum leh Aibawk-ah hman a ni a. Melthum-ah hian Central YMA kaihhruaina in tlai dar 4:00-ah hun hman niin Aibawk-ah chuan tlai dar 3:00-ah Chhimphei Group YMA te kaihhruainain hun hman a ni.