Hrangturzo Bialtu MLA in X-Ray khawl a hlan

Hrangturzo bialtu MLA leh Adviser to Chief Minister Lalmuanpuia Punte chuan a bial chhunga Health Care Centre pathum- Biate CHC, East Lungdar PHC leh N. Vanlaiphai PHC a hman turin Inrinni khan X-Ray khawl a hlan.

Heng khawl te hlanna puala inkhawm tawi Inrinni a a Pisa-a neih ah Hrangturzo Bialtu MLA Lalmuanpuia Punte chuan MLA Fund-ah a ngaih pawimawh ber chu vantlangin a huhoa an chhawr tlan theih thil tih nana hman a ni tih sawiin, “Biate X-ray khawl khi Dr. Arora Director laia mi daih tawh kha a ni a. N. Vanlaiphai a mi khi 2016 khan a chhia a. MLA Fund hmangin a lei theih angem tih ka ngaihtuah thin a, lei theih a ni tih ka hriat hnuin MLA Fund hlui, la hman zawh loh hmang khan kan lei ta a ni. A leina leh a installna zawng zawng nen pakhat hi nuai 6 velin a zawhtheih a ni,” tiin “Tuna kan khawl lei hi 300 ma. a ni a. A that leh that loh ka zawt kual a, kan khawl lei hi tha ve thawkhat tura ngaih a nih thu min hrilh hlawm a ni,” a ti bawk.

Heng Health Care Centre hrang hranga X-Ray khawlte hi a hmantlak tawh meuh lo nia thudawn niin, a khawl a hluiin a fiah lo a, a chhawrtu mipuite tan harsatna an lo tawk tawh thin nia thudawn a ni bawk a, Hrangturzo Bialtu MLA chuan, “Tangkai taka bialchhung mipuiten an hman ka beisei hle a ni. Zirna leh hriselna hi ka ngaipawimawh hle a, vantlang hriselna a that loh chuan vantlang nun a hlimthei lo a, Zirna a that loh chuan ramin hma a sawn thei lo a ni, chu chu ngaihpawimawh leh zual ka tum a ni,” a ti bawk.