ASF nasa telh telhah ngai lo

Mizoram tibuai mektu African Swine Fever (ASF) vangin Vawk thi la awm reng mahse he hrileng hi a nasa telh telh tia sawi tur chu a ni lo ah ngaih a ni.
AH & Vety Department hotute chuan ASF vang hian Vawk thi ala awm reng tih sawiin, he hri hi a len hmasakte nena khaikhinin a darhzau rih lo zawk tih an sawi a, ASF hmuh lohna District a la awm thu te, ASF awmna District-ah pawh hmun hrang hrangah zau takin a darh rih lo tih te an sawi a ni. June 4, 2024 thleng khan Champhai, Aizawl, Lunglei, Saitual, Khawzawl, Serchhip leh Kolasib District-ah te ASF hi hmuh a ni tawh a. Aizawl District-ah pawh Aizawl khawpuiah a darhzau a, District dangah hi chuan hmun hrang hranga darh a ni rih lo.

Kumin hian Champhai District-ah khaw pahnih ah ASF hi hmuh a ni tawh a, Lunglei District-a khaw pahnih ah, Saitual District-a khaw pathum ah, Khawzawl District-a khaw panga-ah, Serchhip District-ah khaw pahnih leh Kolasib District-ah khaw pathumah hmuh a ni tawh bawk a. June ni 5-ah Mamit District-a Ailawng-ah hmuh niin Vawk thi erawh a awm lo thung a. AH&Vety Department hotute chuan tum dangah pawh June leh July vel hi a darh hun a nih thin thu an sawi a, chuvang chuan kumin ah pawh fimkhur zel a ngai tih an sawi bawk.

ASF hi kum 2021 khan Mizoram-ah hmuh a ni a, AH&Vety Department chuan kum 2021 kumtir lam atanga kum 2022 February thlenga hri leng kha a thawh khatna tiin an chhinchhiah a. Kum 2022-ah hian a thawh hnihna lehin a thawh hnihna hi February 2022 chawhnu lamah a intan a, December ni 22-ah a tawp a ni. Kum 2023-ah a thawh thumna a leng leh a, kum 2023-a an finfiah hmasak ber chu May ni 6-ah niin chu chu tawp lovin a la leng ta zel a ni. Kum 2023 May thla atangin a thawh thumna a leng a, kumin April vel atangin a zual tih chu AH&Vety Department hotute sawi dan a ni a. Mahse tunhnaiah ASF hi a nasa telh telh rih lo thung niin an sawi.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man