Tunhnaia thli, ruah leh Rial thawk avanga Mizoram-a In chhia sang khat chuang a tling tawh

Pathianni leh a hnu lama Mizoram hmun hrang hranga thli, ruah leh rial thawk avanga In chhia chu sang khat chuang a tling tawh nia chhinchhiah a ni.

Pathianni zing leh zan lama thlipui leh ruah in Mizoram a nuai avang leh a hnu Rial tla in chhiatna a thlen dan hi report dawn belh zel niin Kolasib District chu a tuar na ber nia hriat an ni a, he District chhunga khua leh veng 9-ah mihring chenna In leh mihring chenna nilo, sawrkar building leh Biak In 744 zet a chhia a, In chhia te hi a tam zawk chu rial-in a chung chauh a tihchhiat te niin, thli a tel avanga Lungdai-ah chenna in pakhat chu a vaiin a chhe vek a. Lungdai bakah hian Serkhan, Buhchangphai, Bilkhawthlir North leh South, North Chawnpui, North Chhimluang, Saiphai leh Saipum te pawhin tuarin Bilkhawthlir South-ah hian Rial vanga In chung chhia 216 a awm a; Anganwadi Centre pahnih, PHC Quarters 7, Police Quarters 3, UPS building leh Primary School building pakhat ve ve te a chhia a. Bilkhawthlir North-ah chenna In chhia 185 zet a awm bawk a ni.

Champhai District-ah pawh In 134 zet chhiain In 5 chu luah zui tlak lohin a chhia a, In 129 chu a then a zar chhia niin chung zingah chuan Middle School, High School, Higher Secondary School, PES leh Supply Kudam pakhat theuh, Myanmar raltlante dahna Buk 7 leh Distric Jail te a tel a. Champhai District a khua leh veng 23-a mihring 690 ten chhiatna hi an tuar a, chung te chu- Zawngtetui, Sazep, Khuangleng, Hruaikawn, New Hruaikawn, Vangchhia, Vanzau, Bungzung, Khawbung, Zawlsei, Vaphai, Farkawn, Vaikhawtlang, Khuangphah, Hnahlan, Tlangsam, Sesih leh Zokhawthar te bakah Champhai khaw chhunga- Dinthar, Vengsang, Vengthlang leh Jail Veng te an ni a. Report hi a la lut reng bawk a ni.

Mamit District-ah chuan Thawhtanni zing-a Rial tla avangin chenna In 55 a chhia a, a hma ni a thlipui tleh khan In 52 a tichhe bawk a. Khawzawl District-ah chuan thli tleh leh rial tla avangin in 77 a chhia report dawn a ni tawh a. Heng bakah hian Aizawl District hmar lamah In 64, Serchhip District-ah 53, Hnahthial District-ah 20, Saitual District-ah 10 leh Lunglei District-ah In chhia pakhat chhinchhiah a lo ni tawh bawk a ni.

Disaster Management & Rehabilitation Department changtu Minister K. Sapdanga chuan tunhnai a thli, ruah leh rial tla-in chhiatna a thlen tuartute chu theihtawpa tanpui an nih tur thu a sawi a, Chief Minister Lalduhoma pawhin khuarel chhiatna thil a nih avangin Election Commission of India (ECI) hnenah harsatna hi a thlen nghal tih sawiin, Khuarel chhiatna a nih miau avangin inthlan puan hnu Election Model Code of Conduct huam lai ni mah se a theih ang angin tanpui ngaite puih an ni tih sawiin, MLA te chu anmahni bialah an theih ang angin an fehchhuak tih a sawi bawk a. Chhiatna thilah hi chuan Election thuneitu lam pawhin an hrethiam niin a sawi bawk a ni.