Pathianni-a thli leh ruah thawk avangin Serchhip District-ah In chhia 60 chuang a awm

Pathianni zing-a ruahsur leh thli na tak tleh avang khan Serchhip District chhunga khaw 14-ah chhiatna a thlen thu dawn ni tawhin chenna In luah zui tlak loha chhia 4 a awm a, In dang 65 te pawh thli leh ruah avang hian chhiain Biak In chhia pakhat a awm bawk.
Serchhip DC Office atanga LENKAWL in thu a dawn danin Pathianni zing dar 9:30 vela thli leh ruah thawk vak kha Serchhip District-a khaw hrang hrangte pawhin an tuar a, nimin chhun dar 12:00 thlenga Serchhip DC Office-a report tawh atanga a lan danin Serchhip District chhunga khaw 14-ah chhiatna hi thlengin chenna In luahzui tlak loha chhia pali (4) a awm a, heng te hi East Lungdar, Chekawn, Baktawng leh Khawlailung khuaa In pakhat theuh a ni a, heng bakah hian In dang 65 te pawh thli leh ruah avang hian a chhe hlawm bawk a, Chhingchhip khua ah Vawk Farm-a vawk In a chhiat bakah Hualtu khua ah Salvation Army Biak In chung chu thli hian a tichhe bawk a, heng chhiatna thleng hrang hrangah hian mihring thi leh hliam report a awm lo a ni.

East Lungdar khua chu khaw mal-a vanduaina tawk nasa ber niin cheng nuai 15 vel senga sak Mizoram pum huap Pavalai Inkhawmpui neihna tur Pandal chu chhia in Bialsiama te In chu luahzui tlak lohin a chhiat bakah In dang 15 te pawh a chung leh bang te thli hian a tichhe bawk a. Baktawng khua ah Lalhriattiri te chenna In chu luahzui tlak loha chhia in In dang 9 chu a chung leh bang a chhe hlawm bawk a. Khawlailung khua ah Lalnunmawii te In chu luahzui tlak loha chhia in Chekawn khua ah Vanlalchhanhimna te In pawh luahzui tlak lohin a chhe bawk a ni.

Heng bakah hian Chhiahtlang khua ah thli in Inchung leh bang a tihchhiat In 14 awmin Khumtung-ah pawh In 7 chu thli leh ruah hian a tichhe bawk a, Chhuanthar Tlangnuam-ah thli leh ruah in a tihchhiat chenna In 8 a awm a, Bungtlang leh Keitum khua ah thli leh ruah in a tihchhiat In 5 ve ve chhinchhiah a ni a. Ngentiang khuaa PMAY (G) hnuaia Laltlanmawia te In sak chu thli hian a chung leh bang a tihchhiat sak bawk a, Hmunzawl khua ah pawh chenna In pakhat chu thli hian tichhe bawkin Serchhip Kawnpui North VC huamchhung Soil Department Quarters pakhat, mimal luah lai chu luah zui tlak lohin a chhe bawk a ni.

Serchhip District chhung khaw hrang hranga thli leh ruahsur avanga In chhia zinga a tam zawk te hi Pathianni khan a thawmthat hna thawh nghal a ni hlawm a, East Lungdar khua in Mizoram pum huap Kohhran Pavalai Pawl Inkhawmpui a thlenna tur Pandal chhia pawh nimin atang khan hnatlang neiin a sak that hna hi thawh tan lehnghal a ni a, nimin-a hnatlang ah hian Pandal chhia te senghawi niin a theih ang angin Pandal thar tundin hna thawh nghal a ni bawk.