Social Media-a Mizo hmeichhe zahawmna tibawrhbang thei thehdarh Women Commission in a ngai thutak

Tunlaia Mizo hmeichhe thenkhat te’n hmeichhe zahawmna tibawrhbang thei tura Social Media kaltlangin Video leh Thlalak an tarlang ta fo chu Mizoram State Commission for Women chuan ngai thutakin, hetiang thil a thlena Social Media khawih thin leh Youtuber thenkhat ten boruak sosang zawnga thil an vawrh darh zel mai chu pawi an tih thu an sawi.

Mizoram State Commission for Women-a Chairperson Lalchhandami chuan tunlaiah Mizo hmeichhe thenkhatte’n Hmeichhe zahawmna tibawrhbang thei tura Social Media kaltlanga Video leh Thlalak an tarlan tak fo thu leh a lo thlirtute ngaihtuahna hruaisual thei tur angin mipat hmeichhiatna mai bakah dan phal loh Zu te nena chettlatna niawm tak te pawh ualau taka hmuh theiha a awm tak thu sawiin, hetianga Social Media kaltlanga intarlanna te leh a kaihhnawih mipat hmeichhiatna hawi zawnga Video hmuh tur awm fo chu Mizoram State Commission for Women chuan a ngai thu tak hle tih sawiin, tunhnaia thil thlengah pawh ‘Suo moto’ in thubuai siam a nih thu leh chak taka hmalak mek a ni tih a sawi a. Social Media kaltlanga mipat hmeichhiatna hawi zawnga mawi lo taka chetna chungchangah Women Commission chuan ‘Suo Moto’ in Mizo hmeichhe thenkhatte thubuai a lo siamsak tawh thin thu leh Tan in-a dahluh hial te pawh an lo awm tawh thu a sawi bawk a ni.

Mizoram State Commission for Women Chairperson chuan che mawi lo an awm palh changa Social Media khawih thin leh Youtuber thenkhat ten boruak sosang zawnga thil an vawrh darh zel mai pawh pawi a ti hle tih sawiin, mipat hmei-chhiatna rawngkai thalak vawrh darh chu dan anga hrem theih a ni tih mipuiten hria se a duh thu a sawi a. Mawi lo taka che thin te leh dan bawh-chhetute lakah Mizo hmeichhiate zahawmna vawnhim zel nan Commission chuan chak takin hma a la zel dawn tih a sawi bawk a ni.

Hetihlai hian Social activist Vanram-chhuangi (Ruatfela Nu) chuan nimin khan Officer in-Charge, Cyber Crime Police Station Aizawl-ah thubuai thehlutin tunhnaia hursualna lam rawngkai, tawngkam leh chetziaa lantirin video clip-a siam leh thehdarh chungchangah Dan anga hma la turin a ngen bawk a ni.