Revenue Department in Mipuite vuivaina leh rawtna an thlen theihna tur Bawm siam turin hriattir

Land Revenue & Settlement Department chuan an Department Office hrang hrangah April 5, 2024 ralhma ngeia Complaint Box dah vek turin an in hriattir.

March 28, 2024 khan Land Revenue & Settlement Department changtu Secretary Dr. H. Lalthlangliana chuan an Department dawrtute zingah vuivaina nei an awm chuan, chung mite lehkha thehluhna tur Bawm siam a an Office-ah theuh hung turin a hriattir a. Land Revenue & Settlement Department chu mipuite nen hnai taka indawr thin an nih thu leh Secretariat leh Directorate bakah District Office hrang hranga anmahni dawrtute'n an duhkhawplohna leh thawktute laka an lungawilohna hriat tur a awm zauh zauh thin chu a pawi hle tih a tarlang a. “Min dawrtu mipuite'n tuma mitmei veng lova an lungawilohna leh rawtna an thlen theih nan Land Revenue & Settlement Department Secretariat, Directorate of Land Revenue & Settlement leh District hrang hranga Settlement Officer (SO) Office-ah te April 5, 2024 ralhma ngeiin Complaint Box dah vek tur a ni a, Compliance Report hi April ni 9, 2024 ralhmain Deputy Secretary, LR&S email mizoram.revenue@gmail.com-ah thehluh tur a ni,” a ti bawk.

LR&S Secretary chuan Complaint Box hi uluk taka kalh tur a nih thu leh a kalhna chahbi pawh Head of Department/Head of Office emaw, an hnuaia mi Officer rintlak ngeiin an kawl tur a ni tih tarlangin, Mipuite'n lungawilohna emaw ziaka an thlen chu thlatin Head of Office hovin hawn thin tur a nih thu leh ziaka thu thlen te uluk taka ngaihtuahin a chinfel dan kawng zawn nghal tur a ni tih a tarlang a. “Thlatin ni 10 aia tlai lovah a hma thlaa Complaint lut te enzui anih dan a chunga Nodal Officer tarlan ah khian thehluh tur a ni a. Nodal Officer in ni 15 aia tlai lovah Secretary hnenah thehlutin a tul anga sawrkar hotute nen sawiho in action lak zui thin a ni ang,” a ti bawk.

Hei bakah hian mipuite hian Complaint Box-a an ziak hi anmahni in tul an ti anih loh chuan an thehluttu hming ziah kher a ngai lo tih pawh tarlangin, thu zawhfiah zui ngaite awm theih anih avangin Contact no. erawh dah thei se a that thu leh Complaint Box-a thu thlen reng reng hi Confidential a dah tur a ni ang tih a tarlang a. Complaint box a thu thlen remchang lo tan pawh Mizoram Sawrkar in mipuite'n lungawilohna online a an thlen theihna tur portal https://mipuiaw.mizoram.gov.in ah engtik lai pawhin thlen theih reng a ni tih an tarlang bawk a, hei hi Land Revenue & Settlement Department a Nodal Officer in a vil reng tih a tarlang bawk a ni.