Raltlan lut thar te tlawh

Tunhnaia Paletwa Township, Chin State atanga Khumi raltlan mi 85 te Lunglei District chhunga khaw pakhat-a an rawn luh belh chungchang ah Lunglei District Bawrhsap Ramdinliani chuan niminpiah khan Khawmawi khua a tlawh a, DC chuan Raltlante chu ramdang mi an ni angin India khua leh tui ten chanvo an neih ang an nei ve theih lova, sawrkar, VC leh YMA ten inkaih-hruaihna an duan te tha taka zawm turin a chah a ni. India sawrkarin Myanmar atanga rawn ral-tlante Refugee angin pawm loh mahse Mizoram sawrkarin mahni mihringpuite hmangaihna rilru (humanitarian ground) avang chauhin Myanmar raltlante a lo tuamhlawm thu pawh DC chuan sawiin, raltlante chu India sawrkar dan leh hrai te zawm tura hrilhin, ruihlo tawlh leh sualna dangah inhnamhnawih lo turin a chah bawk. Lunglei DC hian raltlan lo lut tharte awmna tura In sakna tur hmunhma te pawh a tlawh nghal a ni.