MP Candidate te ngawrh takin an Campaign zel

Tun thla ni 19-a Mizoram Lok Sabha Inthlanpui neih tura Candidate hrang hrangte chuan ngawrh takin Campaign an nei chho mek.

Lok Sabha MP thlanna lo awm tura Independent Candidate awmchhun Lalhriatrenga Chhangte chuan nimin khan Lunglei-ah thuthar thehdarhtute kawmin thlantlin a nih chuan Mizoram leh hnam himna tur bakah thangthar thlenga chhawr tlak hmasawnna nei tura hmalak a tum tih a sawi a, Lok Sabha MP a nih chuan Myanmar leh Bangladesh ramte nen ei leh bar thawhchhuah ho theihna tur kawng dap leh inunauna hrisel nei tura hmalak a ngaipawimawh dawn tih sawiin, Mizorama leihnuai hausakna dapchhuah hna thawh mek chu chak zawka kalpui leh a hlawkna leh hna awm thei ang angte Mizo thalaite'n an chhawr theih nan hmalak a tum tih a sawi. 

MNF Candidate K. Vanlalvena chuan nimin zing khan Lawngtlai Press Club-ah thuthar thehdarhtute kawmin Rajya Sabha MP atan MNF atanga thlantlin a nih vangin Lok Sabha inthlanpuiah MNF Party behchhana candidate a nih a ngaih thu a sawi a, Party behchhan nei mahse Mipui Candidate a nih thu sawiin, MP a thlantlin a nih chuan State sawrkarin a hmang tangkai duh a nih phawt chuan ram tan theihtawp a chhuah tur thu a sawi a. India rama hnam tenau zawk leh Sakhaw tlem zawkte nekchep an nihnaah an hmaa ding tur a ni tih pawh sawiin, Zofate rorelna pakhat hnuaia an awmtheihna tura hmalak chu Politics a luhchilh chhan leh a tum lian ber a nih reng thu a sawi bawk.

BJP Candidate Vanlalhmuaka chuan nimin khan Kolasib Press Club-ah thuthar thehdarhtute kawmin India hmarchhak State pariat zinga State President Candidate awmchhun, Kristian MP Candidate zinga Lok Sabha a ding awm chhun a nih thu sawiin, MP-a a tling a nih chuan Central hotuten Central-a Minister ni thei turin Green Signal an pe tawh niin a sawi a, BJP MP kan nei a nih chuan PM Scheme hrang hrang heng Insakna tur neilo Insak tanpuina te, Loneitute tana tanpuina leh loneitu kum 60 alo tlin huna Pension an lak theih ngei na tur bakah Gas Connection neilo te hnena Free Gas Connection pek tura hmalak nghal a nih tur thu a sawi bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result