Raj Bhavan-ah Ugadi, Gudi Padwa leh Bihu Kut lawm

Mizoram Governor Dr. Hari Babu Kambhampati chuan nizan hmasa khan Raj Bhavan-ah Ugadi, Gudi Padwa leh Bihu Kut lawmna hun khuallian niin a hmanpui.

Larsap chuan heng Kut hrang hrang hman theih a ni chu lawmawm a tih thu sawiin, Ugadi Kut chu Kut pawimawh tak mai, intuaithar lehna Kut anih thu a sawi a. He Kut hi intuaithar lehna entirna a nihna angin State hrang hrang- Andhra Pradesh, Telangana, Karnataka leh Maharashtra-ah te chuan mahni inchei nan te, kawr thar lei nan te leh inhlan thar nan te a hun hman thin anih thu a sawi a. He ni vek-ah hian Maharashtra-ah chuan ‘Gudi Padwa’, Marathi kum thar lawmnan hun hman thin anih thu sawiin, chutiang bawkin Assam-ah chuan Bohag Bihu, an Kumthar bultanna Kut chu April ni 14 hian lawmna an neih ve tur thu a sawi bawk.

Larsap chuan heng Kutpui lawmna hun hman a ni hian India ram chu ‘Lo leh Thlai’ Kut chi hrang hrang ropui tak tak lamah a hausak zia pholanna anih thu sawiin, chung Kut tam tak zinga a lar zualte chu - Baisakhi Kut, Punjab, Haryana leh Himachal Pradesh-a lawm te; Mesadi Kut, Karnataka-a lawm te; Panan Sankranti, Odisha a lawm te leh Vishu, Kerala leh Tamil Nadu a lawm thinte chu an nih thu a sawi a. Heng Kutpui hmante hi hnam hrang hrang, ram hrang hrang atanga rawn kalte intawhkhawmna leh mahni hnam ziarang mawi tak tak pholanna hmun a ni chu Larsap chuan he hun ropuina belhchhahtu anih thu a sawi a, State hran, Hnam hran, Sakhuana hran leh Tawng hran theuh nei ni mah ila kan zavaiin India khua leh tui, ram inpumkhat kan nihna rawn tarlang chiangtu pawimawh tak anih thu a sawi bawk.

He hunah hian Prasad Rao, GM, NABARD, Mizoram chuan Udagi chungchang sawiin, Dr. Kiran Kharat, Asst. Prof., MZU chuan Gudi Padwa chungchang a sawi bawk a. Hnam lam – Kuchipudi lam, Telugu Fusion lam, Bihu lam, Bodo lam, Assamese lam, Marathi Fusion lam, Bharatnatyam lam, Bhangra lam leh Punjabi lam te chu PUC, MZU leh RIPANS zirlaite hnen atanga entir niin heng bakah hian Medley lam, Bollywood zai, Tollywood lam leh Tlang lam te chu MZU leh Hrangbana College zirlai te atangin entir a ni bawk.

Comments

Popular News (Last 30 Days)

LPG man bithliah thar