Mizoram-ah Oil/gas leh lungalhthei awmah ngai; Oil zawngtu ten vbc.36 an chhunglut tawh

Mizoram-a Oil leh Gas zawngtu Company-ten hna an thawhna man sawrkara an chhunluh tawh zat chu Rs. 36,41,17,996.36 a ni a. Mizoram chu Oil leh Gas bakah lungalhthei (coal) haichhuah/laihchhuah tur awma ngaih a ni.

Geology & Mineral Resources Department SPIO-in RTI hmanga zawhna a chhanna atanga a lan danin Mizoram-a Oil/Gas zawng tur Company pathum - ONGC, Oil India Ltd. (OIL) leh The Vedanta Ltd. te hna pek an ni a. Heng company zingah ONGC-in sawrkarah sum an chhunglut hnem ber a, ONGC-I sum chhunluh hi Rs. 14,29,81,007 niin ONGC-II sum chhunluh hi Rs. 74,33,682 a ni a. Oil India Ltd. chuan Rs. 18,14,43,345.36 an chhunglut a, Naftogaz-in Rs. 3,22,03,362 leh The Vedanta Ltd.-in Rs. 56,600 an chhunglut bawk a. Naftogaz hi an Permit cancel sak an ni thung. Mizoram-a Oil zawngtute chuan chan an insem tih sawiin ONGC chuan Mizoram hmar lam block changin kum 2003 atang khan Exploratory Well chu Zanlawn leh Meidum-ah an verh tawh a. Zanlawn Well-ah hian oil/gas hmuhchhuah a ni lo a, Meidum Well-ah erawh Gas signature hmuh niin Economically viable a nih leh nih loh finfiah nan Well dang Hortoki-ah verh leh tura hmalak mek a ni tih a sawi.

OIL hian Mizoram laili changin Exploratory Well chu Maubuang, Keifang, Thenzawl leh Phulmawi-ah te verh tawhin oil/gas hmuh a ni lo vek a. OIL hian Pangzawl-Thiltlang area-ah Well pakhat verh leh tumin hma an la mek a. Hemi atana approach road NH-02, Aizawl – Tuipang hi Widening hna thawh mek atang hian OIL-in an verhna hmun tur hi pengin, thleng tur hian approach road hi siam tum mek a ni a, chumi piah lamah chuan Drill Site siamna tur Civil work pawh Tender process pawh a kal mek tih SPIO chuan a sawi a. The Vedanta Ltd. hian Mizoram hmar tawpah block neiin tun thlengin Oil/gas well verh an la nei lo a  ni.

Mizoram leilung hausakna haichhuak tura hma la tawh company zingah Naftogaz India Private Limited bân/chawlhtir an ni tih sawiin SPIO chuan, Naftogaz India Private Limited hian Naftogza, Ukraine phalna la hmasa lo leh dik lo taka an business reputation leh experience an lo hman sak avangin Ministry of Petroleum & Natural Gas-in Mizoram-a an Petroleum Exploration Licence an tihtawp (terminate)-sak tih a sawi.

Meidum bulah ONGC in gas an hmuhchhuak tih chu a dik tih sawiin, “Well pakhat verha gas hmuh hian leihnuaia a tam zawng (oil/gas reserve) bakah economically viable a ni em tih hrechiang turin a bul hnaiah well pakhat (appraisal well) verh leh tura hmalak mek a ni,” a ti a. ONGC in oil/gas khur an verh lehna hmun tur approach road hi PWD, Govt. of Mizoram in hma an lak mek thu leh Bridge construction hi rokhawlhna hrang hrang vanga zawhfel a la nih loh thu pawh a tarlang a ni.