Office tlai lo tur leh ban hmaa chhuak lo turin ti

Chief Secretary Dr. Renu Sharma IAS chuan Office Memorandum tichhuakin Biometric Attendance System hman tur a nih tawh avangin sawrkar hnathawkte chu tlai lo tur leh a hun hmaa Office chhuahsan lo turin a hriattir.

Office Memorandum-a tarlan a nih danin, CSS (Conduct) Rules, 1964 Rules 3 (i) (ii)-a tarlan angin sawrkar hnathawkte chuan engtik lai pawhin hnathawk tura inpekna an vawng reng tur a ni a, Office kai hun ngai pawimawh lo sawrkar hnathawk lakah thununna lek theih niin Mizoram sawrkar chuan Biometric Attendance System hman relin Mizoram Secretariat-a sawrkar hnathawk zawng zawngte chuan an Biometric an register vek tur a ni a, Secretariat chhunga hnathawktute chu an thlen leh chhuah dawnah Biometrict khawl-ah scan vek zel an ni anga, Checking Officer pawh ruat vek tur an ni.

Checking Officer-te chuan Officer/Staff-te chevel, Office pawn lama Meeting-a tel emaw, Official Duty-a an kal dante an record vek dawn a, Office kal tlai emaw, Office chhuahsan hma emaw chu ni chanve Casual Leave la anga chhinchhiah theih an ni ang a. Danin a sawi angin, loh theih lohna avanga Office tlai/chhuak hmate erawh hriatthiamna a awm thei ang. Administrative head zawng zawngte chuan April, 2024 atangin kar hnih danah Chief Secretary hnenah action taken report an thehlut thin ang. Heng ruahmanna hrang hrangte hi zawm ngei turin Administrative Department Dead zawng zawngte hriattir an ni bawk.