Insurance Certificate lem chungchangah FIR thehlut

Transport Department chuan Insurance Certificate lem chungchangah niminpiah khan Aizawl Police Station-ah FIR an thehlut.

Transport Department Director hminga FIR an thehluh ah hian tunhma deuh atang khan lirthei insurance lem a tam thu an sawi thin tih tarlangin, “He thil hi Transport Department chuan kan ngai serious hle mai. DTO tin te pawh Fake Insurance Certificate an hmuh chu man zel tura hriattir an ni Chumi kal zelah chuan DTO (RA) chuan March 22, 2024 khan insurance certificate lem an mante a rawn thehlut,” an ti. Insurance Certificate lem hian lirthei neitute a tibuai hle thin tih pawh tarlangin, “Lirthei-in chhiat a tawh palhin Insurance an claim thei lova. Chu chuan harsatna chi hran hran a hring chhuak ta thin a. Mipui tan pawh a him lo takzet a ni,” tiin hetianga Insurance Certificate lem zuarte hi Social Media platform hrang hrang Facebook, Whatsapp, etc. kaltlangin an inzuar thin ni a hriat a nih thu an tarlang bawk.

Transport Department chuan Insurance Certificate lem hi lirthei neitute tan leh mipui tan a him loh avang leh inbumna thil anih avangin a tul anga chhui chhuak a, a mawhphurtu te hrem an nih ngei theihna atan hma lak sak turin Police an ngen a ni.