HSLC Exam meka Question sawisel chungchang Minister in Assembly House-ah a sawifiah

High School Leaving Certificate (HSLC) exam neih meka Social Science (SS) zawhna-a sawisel awm chungchang chu nimin-a Assembly thutkhawm ah School Education Minister Dr Vanlalthlana chuan a sawifiah a. Hemi chungchangah hian Zirtirtu pakhat chu suspend a nih tawh thu leh MBSE in FIR an thehluh thu a sawi bawk.

Nimin-a Assembly Inkhawm-a zawhna leh chhanna hun hman zawh a nih hnuah School Education Minister hian Statement siamin HSLC Exam neih meka Social Science Subject-a sawiselna awm chungchang hi a sawifiah a. Kumin 2024 MBSE hnuaia Board exam kaihhnawihah Subject pakhata suggestion leh Exam zawhna inang tam lutuk avanga Statement siam a ngai ta chu School Education Department leh Mizoram Board of School Education (MBSE) chuan pawi an tih thu Minister chuan sawiin, MBSE hian Board Exam te hi a ngai pawimawhin Printing Press atanga zawhna siamsa put ru a awm lohna turin State Board dangte pawhin an tih ve theuh angin Mizoram pawnah a chhut hna hi thawh thin a nih thu leh Exam Centre hrang hrangah him taka a thlen theih nan District Hqrs. tinah MBSE Officer ngeiin semin Disrict Hqrs. atang hian Centre Superintendent-ten anmahni ngeiin lamin, an khua theuha Police Out-Post-ah emaw, Police Duty awmna hmunah emaw him takin exam chhung zawng vawn thin a ni tih a sawi bawk.

Education Minister chuan March ni 8, 2024 tlai-ah HSLC exam-a Social Science subject-ah Board exam-a zawhna lo chhuak thei awmte rinlawkna (suggestion) ang chauh ni si, Board Exam zawhna nena inang deuh vek chu Govt. Mizo High School Zirtirtu pakhatin a zirlaite hnenah a pek thu Social Media-ah a darh tih hriat a nih veleh MBSE hotuten hma an la nghal tih sawiin, “He thil hi Govt. Mizo H/S zirlai pakhat hnen atangin a chhuak tih hriat a nih hnuah MBSE chuan MISSTA President, Govt. Mizo H/S Headmaster leh zirtirtu inhnamhnawih nia rin chu ko nghalin, thu zawhfiah an ni a. Zirlai naupangte pawh thu zawhfiah leh niin Govt. Mizo H/S Zirtirtu hian suggestion chu a lo pe ngei a ni tih finfiah a ni ta a. He zirtirtu hian naupang zirnaa chak lo bik deuh thenkhat, a hrana zirtirna (Special Class) neihpuiin, suggestion darh chhuak ta hi pein, zirlaite hian an lo ziak thla hlawm a. Zirlai ten an lehkhabu/Rough book-a suggestion an lo ziah thlak pawh evidence atan kawl that a ni,” a ti.

Hetiang thil dik lo lakah hian sawrkar thikthu a chhe thin hle tih Minister chuan sawiin, “Tunhnai mai, kum 2021 pawh khan hei aia buaina te zawkah pawh a mawhphurtu zirtirtu chu suspend a lo ni tawhin a chungah action lak a ni,” a ti a. Dikhlel taka Social Science Subject-a suggestion petu zirtirtu hian sawrkar hnathawk a nih anga sawrkar dan a zawm loh avangin a chungah action lak nghal a nih thu leh March 10, 2024 khan CCS (Classification, Control and Appeal) Rules, 1965 hmangin a hna atanga chawlh lailawk tir (suspend) nghal a nih bakah hemi ni vek hian MBSE lam pawhin Police Station-ah FIR an thehlut nghal tih sawiin, School Education Department lamin Disciplinary Proceedings pawh a la chhun-zawm ang tih a sawi bawk.

He thil thleng avang hian Inrinni leh Pathianni ah te Minister hova Emergency Meeting neih nghal a nih thu Minister hian sawiin, “Vawiin-ah Examination Committee an thukhawm nghal dawn a, hemi paper bika hma lak chhunzawm dan tur an ngaihtuah ang. MBSE hnuaia Class X Exam hi chu routine pangngai angin a la kal chhun-zawm dawn a ni,” a ti bawk.

Education Minister chuan Zirtirtu sang chuang karah zirlaite hnena zawhna lo sawi chhuaktu mi pakhat hian zirtirtu dangte nihna a tarlang lo tih hi mipui ten lo hriat sak tura a duh thu pawh sawiin, “Kan zirtirtute hi kan la ring zo tawk,” a ti bawk.

Comments

Popular News (Last 30 Days)

LPG man bithliah thar