Zirna ah Mizoram a hlawhchham niin sawi

Chief Minister Lalduhoma’n zirna ah Mizoram a hlawhchham tih chu pawm ngam a ngai tih sawiin, a siam that nan sawrkar leh mipui thawhhona, Public-Private Partnership ngaih pawimawh a ni dawn tih a sawi.

Nimin-a Assembly thutkhawmah Chief Minister Lalduhoma chuan sawrkar tharin a ngaih pawimawh chu PPP Mode a ni dawn tih sawiin, hetah hian Private School leh Kohhran School te nen thawkho in sawrkar in a tanpui dawn a, zirna Fee pawh tihhniam tir tum an ni dawn tih a sawi a. Zirna ah ‘3 Language Formula’ chu an ngai pawimawh dawn tih sawiin, English, Hindi leh Mizo tawng chu an ngai pawimawh dawn tih a sawi a, tunhma in zirna ah Kohhran thuk takin a inrawlh thin thu leh hun a rei hnuah Kohhran inhnukdawk in Sawrkar a inrawlh thuk tual tual a, sawrkar sikul alo tam a, hlawh sang zawk leh qualification tha zawk ruaiin zirna erawh a chhe tual tual niin a sawi a, English Medium-a zirtirtu hlawh tlem zawk te zirna pek theih ang chu hlawh tam zawkin an pe thei tawhlo a, kum tam tak School khar a awm chho zel a, Education-ah Mizoram a fail tih chu pawm ngam a tul tih a sawi bawk.

Chief Minister chuan Mizoram hmun hrang hrangah sawrkar sikul sakna tur cheng vbc. 31.50 dah anih thu sawiin, Quarters sakna ah Principal emaw, Head of Institution emaw in hming a ziah loh chuan bill pek ani dawn lo tih a sawi bawk a. Library leh Computer a thlawna khaw 237 hnena pekna tur cheng vbc. 55 chu Finance Ministry in a pek thu leh First Instalment vbc. 27 vel an dawng tawh tih a sawi bawk.