Sawrkar hnathawk mahni post lo a awm sang li awm

DP&AR changtu Minister K. Sapdanga'n Mizoram sawrkar hnuaia thawk zingah, mahni post ni lo, hmun dang a thawk (attach) mi 4,000 an awm tih House a hrilh.

Assembly Budget Session neih mekah nizan hmasa-a a Department chanpual enkawlna tura sum ruahman sawihona tlang a kawmna ah DP&AR Minister chuan he thu hi sawiin, Department 27-ah mahni Post ni lo hmun dang a thawk (attach) an awm thu leh School Education Department-ah tam berin mi 1,776 an awm thu a sawi a, Home Department-ah 1,282, P&E Department-ah 286 leh PHE Department-ah 227 an awm thu a sawi bawk. Group A zingah mahni post ni lo hmun dang a thawk mi 115 an awm thu pawh Minister chuan sawiin, Group B-ah mi 347, Group C-ah 1,242 leh Group D-ah mi 193 an awm thu a sawi a. Hengte bakah hian Cotract Employee zingah mi 11 awmin, Provisional Employee (PE)-ah mi 257, CSS hnuaia thawk mi 1,787 leh Workcharge mi 49 an awm thu a sawi bawk.

DP&AR Minister K. Sapdanga chuan, Attach thenkhat hi chu hna tul vang, Department hotute ruahmanna anga inhawh tawn an ni thei tih a sawi a, thenkhat erawh chu thawhna hmun a awm hreh vanga thuneitu sang ruai a, rem leh rem lo a attach an nih thu a sawi a. “Heng zawng zawng aia tha lo chu Officer thenkhatin an mimal hna thawk tur an hnuaia thawkte an chhawr thin hi a ni,” a ti bawk.

DP&AR in Service hrang hranga Officer a enkawl dan pawh Minister hian tarlangin, All India Services Officer atangin Assistant Grade thlenga a enkawl thu sawiin, tun dinhmunah Mizoram sawrkar hnuaiah Indian Administrative Service (IAS) Officer 28, Indian Police Service (IPS) Officer 22, Indian Forest Service Officer (IFS) 16, Indian Revenue Service (IRS) 3 Indian Audit and Accounts Service (IA&AS) pakhat leh Indian Railway Accounts Service (IRAS) pakhat a neih mek thu a sawi a. Mizoram Civil Service (MCS) Sanction Post 254 awmin Officer 199 an awm thu leh Mizoram Secretariat Service (MSS) Officer santion Post 259 a awm laiin Officer 258 an awm thu a sawi bawk.

Mizoram sawrkar hnuaia Secretariat emaw, Directorate emaw, Subordinated Office nei Department 42 zingah Department 38-ah aikal la an awm thu Minister chuan sawi bawkin aikal lak zat chu 3365 a nih thu leh aikal la awm lohna Department 4- Excise & Narcotics, ICT Department, DP&AR leh Vigilance te an nih thu a sawi a. Aikal la te hi a mal malin chhuichhuah thawkhat an ni tawh tih pawh sawiin, aikal lak chu Recruitment Rules leh Service Rules-ah a awm lo tih a sawi a, “Sawrkar hnathawk tura lak in eng vang pawhin a hna a thawk lo a nih chuan aikal la eng ang mah se Dan a bawhchhe tho a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar