Thalai hnathawh tur buaipui

Mizoram Larsap Dr. Hari Babu Kambham-pati leh Mizoram Youth Commission (MYC) Chairman Malsawmzuala Ralte te chuan niminpiah khan Andhra Pradesh-a Sri City Special Economic Zone tlawhin Sri City Managing Director leh thawktu dangten an lo dawngsawng a, SEZ chhunga Company hrang hrang heng - ISUZU, Colgate, Pepsico, Foxcon, Daikin, Havels, Kobelco etc. aiawhte nen thukhawmin, Mizo thalaite tana hnathawh ve theih dan turte an sawiho nghal bawk a ni. Sri City Special Economic Zone-a Company hrang hrang 100 chuang awmah thawktu 60,000 vel zet an awm a, hengah hian Security Guard atanga ITI pass chhuak, Diploma Holder, Class 10 attanga Graduate chin leh Engineer Degree neite tan hnathawh tur remchang awm thei tura ngaih a ni a. Human Resource Department te nen ruahmanna siamin, anni lamin hnaruak, thiamna ngai chin leh hlawh tur zat an rawn ruahman fel ang a, chumi mil chuan MYC in a thawk thei tur Mizo thalai a lo ngaihtuah dawn a ni.