Stamp duty zaa 3-a tihsanna tur ‘The Indian Stamp (Mizoram Amendment) Bill, 2024’ a pass a ni

Nimin-a Mizoram Legislative Assembly thutkhawm ah ram lei, hralh leh dahkhamna a mipuite Chhiah chawi tur ennawnna, The Indian Stamp (Mizoram Amendment) Bill, 2024 chu pawm a ni.

Nimin-a Assembly thutkhawm ah Land Revenue & Settlement Department changtu Minister B. Lalchhanzova chuan The Indian Stamp (Mizoram Amendment) Bill, 2024 hi House-ah pulutin he Bill hi ram lei, hralh, inhlanchhawn leh dahkham chungchanga mipuiin sawrkar-a Chhiah an chawi tur siamthatna a ni a. Bill putluh pah-a thu a sawina ah Revenue Minister B. Lalchhanzova chuan, Mizoram-ah inhmun a to chak hle tih sawiin, mi thenkhat phei chuan number an hriat zat zat an chhiar emawni tih mai a awl thu a sawi a, mi harsa tan Inhmun lei a harsat zel avangin Stamp Duty chu changtlug zawka kalpui a nih chuan Valuation Commitee kalpui ang a, ram hlutna atanga chhutin ram man chu chhiar a nih tawh dawn avangin ram man sang lutuk chu dolet theih a nih a rin thu a sawi bawk. Revenue Minister chuan Finance changtu Chief Minister-in kum 2024 -2025 Mizoram Budget a pharh khan Stamp Duty lak san a nih tur thu a sawi tih sawiin, hmeithai leh hmeichhia dinhmun hniam te tan erawh a punna a tlem dawn tih a sawi a. Ram lei leh hralh ah te Stamp Duty pek a ngai tih mipuite’n hria se a duh tih sawiin, Bill hi ram tana tha tura an tih anih avangin sawiselna awm mah se mawh a phurh ngam tih a sawi bawk.

He Dan siamthat ah hian Ram lei leh hralh-ah chuan a ram hralh hlutna atanga chhuta zaa 3 chu a leitu in sawrkar-ah Chhiah a chhunglut anga, a leitu chu hmeithai anih chuan zaa 2.5 a chhunluh a ngai dawn thung a. Ram inpekchhawnah chuan a petu in a pek a kha ama chhungkaw zinga mi a nih loh chuan, a dawngtu kha hmeithai a nih chuan ram hlutna atanga zaa 2.5 a chawi anga, midangah chuan zaa 3 chawi a ngai a. A petu in a pek-a kha a chhungte zinga mi anih chuan ram hlutna atanga zaa 1 emaw, Rs. 5,000 aia tam lo a chawi a ngai dawn a ni. Ram dahkhamtu in a dahkham a chawiin a neihsaktu-in a dahkhamtu hnena Certificate of Sale-ah ram hlutna atanga zaa 3 sawrkar-ah chhunglut ang a, ram dahkhamtu chu hmeithai anih chuan zaa 2.5 a chhun a ngai dawn a. Ram dahkham chu a neitu nihna thlak tel anih chuan hmeithai in dahkham hlutzawng atanga zaa 2.5 leh midangah zaa 3 lak tur a ni a, dahkhamah neitu nihna thlak a nih chuan dahkham hlut zawnga atanga zaa 1 aia sanglo lak tur niin Rs. 1,000/- a pel tur a ni lo thung a. Dahkham chu laklet a nihin dahkham hlutna in Rs. 5,000/- a khum loh chuan Rs. 1,000/- chawi tur a ni a, Rs. 5,000/- a khum erawh chuan Rs. 2,000/- chawi tur niin Rs. 2, 000 aiin a sang tur a ni lo a ni bawk.