HSLC Exam question put ru chungchanga mawhphurtu Jail-ah a awm thu Minister in a sawi

School Education Minister Dr. Vanlalthlana’n tunhnaia pawl 10 Exam-a zawhna put ru chungchanga mawhphurtu chawlhtir tak chu Jail-ah a awm mek thu a sawi.

Nimin-a Mizoram Assembly thutkhawma zawhna leh chhanna hunah School Education Minister chuan tunhnaia pawl 10 Exam-a zawhna put ru chungchangah sawrkarin hma a la tih sawiin, mawhphurtu chawlhtir anih hnuah MBSE in Police-ah FIR an thehlut tih sawiin, Session Judge a awm remchan loh avangin Zirtirtu suspend chu Jail ah a awm mek thu leha, hmalak chhoh zel a ni tih a sawi a. He thil thleng chungchang sawi zuiin, tun hnuah zirtirtuten zawhna an siamna Room-ah CCTV an dah tawh dawn tih sawiin, hei hian mitin te tih fuh loh palh awm thei lakah a ven dawn thu leh fair taka kalpui tum a nih thu a sawi bawk.

School Education Minister chuan SEDP hnuaia Zirtirtute tawp tir an nih huna Zirtirtu indaihlohna avanga harsatna awm tur te sukiang turin ruahmanna siam mek a nih thu pawh a sawi a, Samagra hnuaia thawk Zirtirtute dinhmun pawh siamthat tum a ni tih sawiin, Samagra Shiksha hnuaia Upgradation of School kalpui nana Zirtirtu 161 lak hna chu fair taka kalpui a nih thu leh result tihchhuah ttep anih thu a sawi a, School upgrade te chu hma lo tan nghal se a duh tih a sawi bawk.

Hei bakah hian Education Minister chuan School hrang hrang dinhmun sang zawka hlankai te chu a taka function theih hun tur hriat la ni lo mahse Budget-ah dah a nih thu a sawi a, DP&AR leh Finance-ah kal mekin, a then chu upgrade dan dik-a Upgrade an nih thu leh a then erawh ennawn ngai an ni tih a sawi bawk. School Education Department hnuaiah Zirtirtu post ruak 2991 a awm mek tih pawh sawiin, Zirtirtu post ruak hnawhkhah tum a nih thu a sawi a, Post ruak awmna School bulhnai khua a mi te ngaih pawimawh an ni thei ang em tih zawhna chu, “Recruitment Rules leh sawrkar in Dan a neih sa anga lak tum a ni a, Merit Base-a lak an ni ang,” a ti a, indaihlohna zualpui chu ngaih pawimawh hmasak tum a nih thu a sawi bawk. NEP hman tura B.P.Ed. lak chungchang chu Education Reforms Committee-ah refer tum a ni tih a sawi a, Samagra hnuaia Electrification chungchang sawi bawkin mi pakhat hmingin School 100 chuangah Electrification hna thawh mek a nih thu pawh a sawi bawk.