Mumal zawka Agriculture Marketing kalpuina tur buatsaih mek a nih thu Agriculture Minister in a sawi

Agriculture Department changtu Minister PC. Vanlalruata chuan mumal zawka Agriculture Marketing kalpuina tur buatsaih mek a nih thu nimin-a Assembly thutkhawm ah House a hrilh a. Scheme remchang apiangah Farm Mechanization chu phak ang tawk tawkin kalpui thin a nih thu a sawi bawk.

Nimin-a Mizoram Legislative Assembly thutkhawm zawhna leh chhanna hunah ZPM Member W. Chhuanawma zawhna chhangin Agriculture Minister PC. Vanlalruata chuan mumal zawka Agriculture Marketing kalpuina tur buatsaih mek a nih thu sawiin, sawrkar chuan Agriculture Marketing mumal zawka kalpui a nih theihna atan hian Agriculture Produce & Livestock Marketing (Promotion & Facilitation) Model Act, 2017 leh Contract Farming & Services (Promotion & Facilitation) Model Act, 2018 chu kan State milin buatsaih mek a nih thu a sawi a. Model Act pahnihte hi peihfel a nih hmaa hman turin Council of Ministers chuan February 5, 2024 khan Operational Guidelines for Agriculture Market Assurance Fund (AMAF) a pawm lailawk tawh tih a sawi bawk a ni.

Agriculture Minister chuan hun engemaw chen atang tawh khan Scheme remchang apiang ah Farm Mechanization chu phak ang tawk tawkin kalpui ve thin a nih thu pawh sawiin, “Kum 2014-15 atang khan Central sawrkara Ministry of Agriculture, Mechanization & Technology Division hnuaiah Mission Mode-in kalpui tan a ni,” a ti a. Hemi atan hian sawrkar laipui chuan Sub-Mission on Agricultural Mechanization (SMAM) Scheme a siam thu sawiin, “Chumi kaih-hruaina zulzui chuan Mizoram sawrkara Agriculture Department chuan kumtin in Annual Action Plan a siam thin,” a ti a, SMAM atanga Fund hmuhte hmang hian loneitute hnenah loneihna atana tangkai tur khawl leh hmanraw hrang hrangte lei nan subsidy pek thin a nih thu a sawi bawk a. Custom Hiring Centre atan zaa 95 subsidy a awm theih thu leh chu chu a tam berah Rs. 9,50,000/- a nih thu a sawi bawk.